Ekibastuzdaǵy káriz kollektoryn jóndeýge 5,2 mlrd teńge qajet

PAVLODAR. KAZINFORM — Buǵan deıin apattyq jaǵdaıda turǵan jelige baılanysty tehnogendik sıpattaǵy tótenshe jaǵdaı rejımi jarııalanǵan edi. Jergilikti kommýnaldyq kásiporyn ony jańartýdyń jobasyn ázirledi.

Belgili bolǵandaı, Ekibastuzdyń 50 jyldyǵy kóshesi boıynda ózdiginen aǵatyn magıstraldik káriz kollektory ábden tozýyna baılanysty ótkizý qabileti tómendep qalǵan. Qubyr boıynda jaryqtar paıda boldy, joǵarǵy bóligi opyrylyp, avarııalyq jaǵdaılar jıi týyndap otyr.  

Qalyptasqan jaǵdaıǵa baılanysty Ekibastuz qalasyndaǵy magıstraldik káriz kollektorynda jergilikti aýqymdaǵy tehnogendik sıpattaǵy tótenshe jaǵdaı rejımi jarııalandy. 

«Tótenshe jaǵdaı rejımi arnaıy qarjy bólýge, jóndeý jumystaryn bastaýǵa múmkindik beredi. «Gorvodokanal» MKK «Transheıasyz tásilmen (sanatsııa ádisimen) káriz kollektoryn qaıta jańartý» jobasyn ázirledi. Joba qajet soma — 5 mlrd 229,5 mln teńge. Kollektordyń uzyndyǵy-2,26 km, qubyrdyń dıametri 1 200 mm», - dep habarlady qalalyq ákimdikten.

Sanatsııa ádisi jumystardy transheıasyz tásilmen júrgizýdi kózdeıdi. Jumystyń bul túri qala turǵyndary úshin qolaısyzdyqty barynsha azaıtyp, kollektordyń úzdiksiz jumys isteýine múmkindik beredi.