Ekibastuzdaǵy ekinshi GRES-te jańa energobloktar salynady
ASTANA. KAZINFORM – Prezıdent energetıka salasynda taıaý jyldary atqarylatyn naqty jumys baǵyttaryn atap ótti.
– Qazaqstannyń energetıkalyq áleýetin nyǵaıtý – basymdyqqa ıe mindet. Bıyl batys aımaqtardyń elektr jelisin kúsheıtetin biregeı joba aıaqtalady. Bul joba Batys Qazaqstan, Atyraý, Mańǵystaý oblystarynyń energetıkalyq toraptaryn biriktiredi. Endi osy toraptardy biryńǵaı ulttyq energetıka júıesine jalǵaý qajet. Elimizde basqa da iri jobalar qolǵa alynyp jatyr. Atap aıtqanda, Ekibastuzdaǵy ekinshi GRES-te jańa energobloktar salynady. Sondaı-aq úshinshi GRES-tiń qurylysy bastalmaq. Bul nysandar elimizdegi energetıka jetispeýshiligin joıýǵa tıis. 2026 jyly Almatydaǵy elektr stantsııalaryn jańǵyrtý – Úkimet pen ákimdik aldynda turǵan mańyzdy maqsat. Sol arqyly aýanyń lastaný deńgeıin tómendetip, qalanyń ekologııalyq ahýalyn jaqsartý qajet. Buǵan qosa, kelesi jyly Qyzylorda jáne Túrkistan oblystarynda bý-gaz qondyrǵysy bar elektr stantsııalaryn tolyq iske qosý kerek. Biz 2035 jylǵa deıin 26 gıgavattan astam qýat kózin óndiretin nysandardy iske qosýdy josparlap otyrmyz, – dedi Memleket basshysy.
Prezıdenttiń pikirinshe, Qazaqstannyń tabıǵı resýrstaryn jáne óndiristik áleýetin eskersek, biz elektr qýatyn basqa elderden satyp almaýymyz kerek.
– Túptep kelgende, bul – ulttyq qaýipsizdik máselesi. Budan bólek, elimizdiń zor energetıkalyq múmkindigin tıimdi qoldaný qajet. Mysaly, Qazaqstan – kómirge baı el. Jyl saıyn 110 mıllıon tonnadan astam kómir óndiriledi. Osy strategııalyq artyqshylyqty durys paıdalanǵan jón. Biz zamanaýı úlgidegi «taza kómir» tehnologııasyna tezirek kóshýimiz kerek. Sol arqyly kómir stantsııalarynyń tıimdiligin arttyra túsemiz. Budan bólek, Kýrchatov qalasynda jylý elektr stantsııasyn, Kókshetaý, Semeı, Óskemen qalalarynda jylý elektr ortalyqtaryn salý qajet. Osy nysandardyń barlyǵyna «taza kómir» tehnologııasyn engizý kerek. Shyndyǵyn aıtsaq, bul jobalardyń júzege asýy ábden sozylyp ketti. Endi ary qaraı kútýge bolmaıdy, – dedi Qasym-Jomart Toqaev.
Memleket jańartylatyn energııa kózderin damytýǵa da tıisti kóńil bólinip jatqanyn jetkizdi.
– Elimizdegi kómir qory – shamamen 33 mıllıard tonna. Soǵan qaramastan, biz jańartylatyn qýat kózderin damytýǵa basa nazar aýdaryp otyrmyz. Sońǵy 5 jylda osy salaǵa 2,5 mıllıard dollarǵa jýyq ınvestıtsııa salyndy. Sonyń nátıjesinde energetıka sektoryndaǵy jańartylatyn qýat kózderiniń úlesi 7 paıyzdan asty. Ekologııalyq turǵydan taza energııa óndirisin odan ári damytý úshin álemdik eń úzdik kompanııalarmen áriptestik ornattyq, – dedi Prezıdent.
Aıta keteıik, Prezıdent mańyzdy mindetterdi júzege asyrý úshin energetıka salasyn túbegeıli jańǵyrtý kerektigin aıtty.