Ekibastuzdaǵy balabaqshada tórt jasar bala atseton iship ýlandy

ASTANA. KAZINFORM – Ekibastuz qalasyndaǵy № 24 balabaqshanyń tárbıelenýshisi shuǵyl aýrýhanaǵa jatqyzyldy. Dárigerler onyń jaǵdaıyn ortasha aýyr dep baǵalady.

Jedel járdem oqıǵa ornyna nebári 6 mınýtta jetken. Bala hımııalyq ýlanýmen qalalyq aýrýhanaǵa jetkizildi.

Bilim bólimi oqıǵany rastady, biraq balanyń eritkishti qaıdan tapqany jáne qazir balabaqshada jóndeý jumystary júrgizilip jatyr ma, joq pa degen suraqqa jaýap bermedi. Qyzmettik tekserý jumystary júrgizilýde.

«Ekibastuz qalasyndaǵy № 24 balabaqshada balanyń hımııalyq kúıik alý deregi oryn aldy. Kámeletke tolmaǵan bala qalalyq aýrýhanaǵa jatqyzyldy. Oǵan medıtsınalyq kómek kórsetildi. Qazirgi kezde tergeý amaldary júrgizilýde. Olardyń qorytyndylary boıynsha tıisti sharalar qabyldanatyn bolady», - dep habarlady bilim basqarmasynyń baspasóz qyzmeti. 

Jeltoqsan aıynda 5 jasqa tolatyn búldirshin qazir dárigerlerdiń baqylaýynda. Onyń aýzy men tamaǵyn hımııalyq kúıik shalǵan.

«Bala 15 tamyz kúni saǵat 17.20-da eritkishpen ýlaný belgilerimen tústi. Asqazany shaıyldy. Jaǵdaıy ortasha. Búgin ol bólimge aýystyryldy», - dep habarlady densaýlyq saqtaý basqarmasy.