21:10, 15 Qańtar 2025 | GMT +5
Ekibastuzdaǵy balabaqshada balany aıaýsyz uryp-soqqan tárbıeshi vıdeoǵa túsip qaldy
PAVLODAR. KAZINFORM — Áleýmettik jelide Ekibastuz qalasyndaǵy balabaqshalardyń birinde búldirshindi aıaýsyz uryp-soqqan tárbıeshiniń vıdeosy tarady.
Jelidegi jazbada bul oqıǵa «Sábı sıtı» balabaqshasynda bolǵany aıtylǵan.
— Oqıǵa jekemenshik balabaqshada bolǵan. Tergeý sharalary júrgizilýde, onyń nátıjeleri boıynsha tıisti sharalar qabyldanatyn bolady», — delingen bilim bóliminiń habarlamasynda.
Sonymen qatar, vıdeonyń astyna balanyń aıaýsyz soqqyǵa jyǵylǵany týraly pikirler jazylǵan.
— Vıdeodaǵy meniń jıenim. Ol eki jasqa da tolmaǵan. Bolǵan oqıǵanyń jartysy ǵana vıdeoǵa túsip qalǵan. Budan da soraqysy bolǵan. Bala uıqtaǵysy kelmegeni úshin osylaı jasaǵan. Basqa bireýdiń balasyn bulaı qorlaýǵa qandaı quqyǵy bar? Bala psıhologııalyq túrde de aýyr soqqy aldy», — delingen pikirlerde.
Eske sala keteıik, buǵan deıin Qyzylordada ınklıýzıvti balabaqshada sábıdi urýǵa qatysty qylmystyq is qozǵalǵan bolatyn.