Ekibastuzdaǵy aımaqtyq elektr stansasyn salatyn ınvestor tabylmaı jatyr – Energetıka mınıstri

ASTANA. KAZINFORM – Energetıka mınıstri Erlan Aqkenjenov Úkimet otyrysynda «taza kómir» tehnologııasy arqyly salynatyn jylý-elektr nysandaryn iske asyratyn ınvestor tabylmaı jatqanyn aıtty.

- Memleket basshysynyń taza kómir tehnologııa bazasynda kómir generatsııasyn damytý boıynsha tapsyrmasyna sáıkes, mınıstrlik ekologııalyq talaptar men normalaryna saı keletin birqatar iri jobany iske asyrýdy josparlap otyr. Búgingi tańda Ekibastuzdaǵy №3 memlekettik aımaqtyq elektr stantsııasyn (2640 MVt) salatyn ınvestordy aıqyndaý boıynsha tender ótkizildi. Kýrchatov qalasynda jylý elektr stantsııasyn (700 MVt) salý úshin tender jarııalaý josparlanyp otyr, - dedi Erlan Aqkenjenov.

Mınıstrliktiń málimeti boıynsha Ekibastuzdaǵy jobanyń ınvestoryn anyqtaý tenderi ótpeı qalǵan. Sebebi oǵan bir ǵana kompanııa qatysqan. Al zań boıynsha tenderdi ótken dep taný úshin keminde eki kompanııanyń qatysýy qajet. Osyǵan baılanysty mınıstrlik Úkimetke bir kózden shart jasasý týraly sheshim qabyldaý týraly hat joldaǵan.

- Mınıstrlik «Samuryq-Energo» aktsıonerlik qoǵamy kompanııasymen tikeleı sharttar aıasynda birlesip Kókshetaý (240 MVt), Semeı (360) MVt), Óskemen (360 MVt) qalalarynda jylý elektr ortalyqtaryn qurýǵa arnalǵan jobalardy iske asyryp jatyr. Onda tútin gazdaryn tazalaýdyń ozyq júıeleri, aýyr metaldardy ustaý tehnologııalary qoldanylady, - dedi mınıstr.

Aıta keteıik, búgingi Úkimet otyrysynda elektr energetıkasy salasyn damytý men tsıfrlandyrý barysy talqylanyp jatyr.