Ekibastuzda jylý qubyry jarylyp, 8 kólikti zaqymdady
ASTANA. KAZINFORM — Ekibastuzda jylý jelilerinde gıdravlıkalyq synaqtar júrgizý barysynda qubyr jarylyp, turaqta turǵan avtokólikterge zaqym kelgen. Bul týraly Ekibastuz qalasy ákimdiginiń baspasóz qyzmeti habarlady.
— 22 shildede «Ekibastuz jylý jelileri» JShS tarapynan jylý jelilerinde 16 kgs/sm² joǵary qysymmen josparly gıdravlıkalyq synaq júrgizildi.
Synaq barysynda TM-11 jylý magıstralinde, «ÝAK» dúkeni mańynda dıametri 530 mm qubyr jarylyp, jeliler ótetin jerde jol jabyny kóterilip, turaqta turǵan avtokólikterge zaqym keltirildi. Aldyn ala málimet boıynsha 8 avtokólikke zaqym kelgen, — delingen habarlamada.
Turǵyndar arasynda qaza tapqandar men zardap shekkender joq. Kásipkerlik nysandary men ǵımarattarǵa zaqym kelmegen.
Oqıǵa ornynda polıtsııa qyzmetkerleri, TKSh bóliminiń ókilderi jáne «Ekibastuz jylý jelileri» JShS-niń apattyq brıgadasy jumys istep jatyr. Qalpyna keltirý jumystary júrgizilip jatyr.
— Zardap shekken múlik ıelerine «Ekibastuz jylý jelileri» JShS-ne D.Qonaev kóshesi, 105A mekenjaıy boıynsha nemese 8 (7187) 280-958 telefony arqyly júginý qajet. Shyǵyndy óteý týraly ótinish berý úshin táýelsiz baǵalaý týraly qorytyndy bolýy shart, — delingen habarlamada.
Aıta ketelik Ekibastuzda jol erejesin óreskel buzǵan avtokortej júrgizýshileri jaýapqa tartylǵan edi.