Ekibastuzda jylqyshy ózi baǵyp júrgen maldy urlap, bazarǵa ótkizip jibergen

PAVLODAR. KAZINFORM - Polıtsııa mal urlyǵy deregi boıynsha qylmystyq is qozǵap, tergeý júrgizilýde.

Ekibastuzda jekeniń jylqysyn jaıylymnan urlady degen kúdikke ilingen jylqyshy ustaldy. Ol barymtalap alǵan úı janýaryn bazarǵa aparyp satyp jibergen. Aram jolmen tapqan aqshasyn jeke maqsatyna jumsap ta úlgergen.

- Mal urlyǵy deregi boıynsha qylmystyq is qozǵaldy, tergeý júrgizilip jatyr. Polıtsııa aýyl turǵyndaryn óz maldaryn qaraýsyz qaldyrmaýǵa, aýyl sharýashylyǵy janýarlaryn múmkindiginshe sáıkestendirýge (chıpteý, tańbalaý jáne bırkileý), múmkindiginshe malǵa GPS-treker ornatýǵa shaqyrady, - dep habarlady óńirlik polıtsııa departamentinen.

Polıtsııa buǵan qosa qazirgi ýaqytta «Mal urlaýshy» respýblıkalyq jedel-profılaktıkalyq is-sharasy ótkizilip jatqanyn jetkizdi. Tártip saqshylary 400-den astam avtokólikti, et satatyn 219 oryndy jáne 510 sharýa qojalyǵyn tekserip shyqqan. Nátıjesinde tıisti qujattarsyz mal men et ónimderin tasymaldaýdyń 23 deregi jáne ilespe qujattarsyz et ónimderin ótkizýdiń 6 deregi tirkelgen. Barlyq quqyq buzýshylar ákimshilik jaýapkershilikke tartylǵan. Maly ıesiz júrgen 52 turǵynǵa aıyppul salynyp, 800-ge jýyq bas mal mamandandyrylǵan mal qoralaryna qamaldy.

Eske sala keteıik, Almaty oblysynda 20 mln teńgeniń malyn urlaǵan barymtashylar ustaldy.