Ekibastuzda jeti jasar bala káriz qudyǵyna qulap, aýrýhanaǵa tústi
PAVLODAR. KAZINFORM — Jelide jetkinshektiń qudyqqa qulaǵan sáti túsirilgen vıdeo paıda boldy.
Avtordyń aıtýynsha, jazataıym oqıǵa shahardaǵy ortalyq alań aýmaǵynda, qos sýburqaqtyń arasynda bolǵan. Oqıǵa 20 mamyrda bolǵany belgili.
2019 jyly týǵan er bala tereńdigi eki metrden asatyn ashyq jáne qorshalmaǵan qudyqqa qulap ketken. Saldarynan dene jaraqattaryn alyp, qazirgi ýaqytta medıtsınalyq mekemede em qabyldap jatyr.
— Qaýipti aımaqtyń azamattar men balalar jappaı jınalatyn qoǵamdyq orynda ornalasqany, sonymen birge tıisti qaýipsizdik sharalarynyń, qorshaýlar men eskertý belgileriniń bolmaǵany erekshe alańdaýshylyq týǵyzady. Bolǵan jaǵdaı qalalyq ınfraqurylymnyń qaýipsizdigi men tıisti deńgeıde ustalýyn qamtamasyz etý fýnktsııalary júktelgen jergilikti atqarýshy organ men vedomstvolyq baǵynysty uıymdardaǵy jaýapty laýazymdy tulǵalardyń óz mindetterin tıisinshe oryndamaǵanyn aıǵaqtaıdy dep esepteımin, — dep jazǵan vıdeo avtory Instagram paraqshasynda.
Bul rette avtor kinálilerdi jaýapqa tartýdy, al quqyq qorǵaý organdarynan oqıǵaǵa quqyqtyq baǵa berýdi suraıdy.
— Polıtsııa magıstraldik qubyrlardy salý, paıdalaný nemese jóndeý kezinde qaýipsizdik erejelerin buzý deregi boıynsha qylmystyq is qozǵady. Qajetti tergeý amaldary júrgizilip jatyr. Oqıǵanyń mán-jaıy men sebepteri tergeý barysynda anyqtalatyn bolady, — dep habarlady Pavlodar oblysynyń polıtsııa departamentinen.
Buǵan deıin Ekibastuzda emdelýshiniń dostary dáriger men medbıkeni soqqyǵa jyqqanyn jazǵanbyz.
