Ekibastuzda jer úı órtenip, 6 adam mert boldy

PAVLODAR. KAZINFORM - Ekibastuzdyń aýyldyq aımaǵynda jeke sharýashylyqtyń úıi men sharýashylyq ǵımarattary órtengen. Tilsiz jaýdyń saldarynan úıde bolǵan 6 adam órtenip ketken.

Solnechnyı kentine qarasty sharýa qojalyqtarynyń birinde turǵyn úı men ózge de sharýashylyq ǵımarattary janǵan.

- Kentten 7 shaqyrym jerdegi sharýa qojalyǵynyń ǵımarattary janyp jatqany týraly habarlama búgin saǵat 06.34-te kelip tústi. Oqıǵa ornyna jedel túrde tótenshe jaǵdaı departamentiniń kúshteri men órt sóndirý quraldary, Ekibastuz GRES-2 stansasynyń órtke qarsy qurylymdary, Solnechnyı kentiniń órt sóndirý beketini ókilderi jumyldyryldy. Qutqarýshylar tilsiz jaýdy aýyzdyqtaý barysynda árqaısysy 27 lıtrlik 8 gaz ballonyn syrtqa alyp shyqty. Belgili bolǵandaı, órt jer úıdi tolyqtaı sharpyp, jaqyn mańdaǵy sharýashylyq ǵımarattaryna taralǵan. Jalpy aýdany 930 sharshy metr aýmaqty quraǵan, - dep habarlady óńirlik tótenshe jaǵdaılar departamentinen.

Oqıǵa kezinde úıde 7 adam bolǵan. 1972 jyly týǵan er adam syrtqa óz betimen shyǵyp úlgergen. Qutqarýshylar oqıǵa ornynan (úı ishinen) 6 adamnyń denesin tapqan. Marqumdardyń kim ekeni anyqtalyp jatyr. Tergeý organdary qaıǵyly oqıǵanyń mán-jaıyn anyqtaýǵa kiristi. Zardap shekken adam emdeý mekemesine jetkizilip, qajetti em-dom kórsetilip jatyr.

Tótenshe jaǵdaı departamenti qaıtys bolǵandardyń barlyǵy eresek ekenin, aralarynda balalar bolmaǵanyn málimdedi.

Órtti sóndirýge qutqarýshylardyń jeke quramynan 30 adam jáne 10 tehnıka qatysqan.

Saǵat 12.48 – de sharýa qojalyǵyndaǵy órttiń tolyqtaı aýyzdyqtalǵany habarlandy.
Tótenshe jaǵdaı mamandary órttiń tutanýyna turǵyn úıde bolǵan azamattardyń abaısyzdyǵy sebep bolýy yqtımal degen boljam aıtyp otyr. Oqıǵanyń aldyndaǵy keshte olar spırtti ishimdik ishken. Qaıtys bolǵandardyń úsheýi – er, úsheýi áıel adam. Barlyǵy sharýashylyqta jumys istegen.

Eske sala keteıik, Petropavlda jerasty jylý kollektorynda órt shyǵyp, bir áıel mert boldy.