Ekibastuzda jeke kompanııa domofon tarıfin negizsiz kótergen
PAVLODAR. KAZINFORM - Kenshiler qalasynda bıylǵy mamyr aıynan domofon qyzmeti úshin tólem 550 teńgeden 700 teńgege ósip ketken. Monopolııaǵa qarsy vedomstvo tarıftiń negizsiz kóterilgenin anyqtady.
Óńirlik básekelestikti qorǵaý jáne damytý departamentiniń habarlaýynsha, tarıftiń aıtarlyqtaı óskenine ekibastuzdyq tutynýshylardyń ózderi shaǵymdanǵan. 2025 jyldyń mamyr aıynda abonentter úshin domofon kompanııasynyń qyzmeti birden 150 teńgege ósip, 700 teńge bolǵan. Domofondarǵa tehnıkalyq qyzmet kórsetýdiń jańa mólsherlemesi Pavlodar oblysy boıynsha eń joǵary tarıf ekeni anyqtalyp otyr.
– Qandaı da bir shara qoldanbas buryn, biz jeke kásipkerdiń naryqta shynymen ústem jaǵdaıǵa ıe ekenine kóz jetkizýimiz kerek boldy. Ol úshin naryqqa taldaý jasap, tergeýge shyqtyq. Rásim barysynda qyzmet berýshide tarıfti kóterýge májbúr etetindeı jaǵdaılar tirkelmedi. Tergeý qorytyndysy boıynsha ol 6 mln teńgege jýyq negizsiz monopolııalyq tabys tapqany anyqtaldy, - deıdi departamenttiń tergeý bóliminiń basshysy Álııa Tursynbaeva.
Qazirgi ýaqytta jeke kásipker monopolııaǵa qarsy qyzmettiń tergeý qorytyndysy boıynsha shyǵarǵan sheshimine sotqa shaǵym túsirgen.
Eske sala keteıik, buǵan deıin Aqsýlyq monopolıst qatty qaldyqtar boıynsha tarıfti 21%-ǵa azaıtýǵa májbúr boldy.