Ekibastuzda jańǵyrtylyp jatqan jylý magıstrali 300-den astam turǵyn úıdegi jylýdyń jaqsarýyna áser etedi
PAVLODAR. KAZINFORM - Ekibastuz qalasyndaǵy negizgi jylý jelileriniń biri – TM-16 magıstraly «Energetıkalyq jáne kommýnaldyq sektorlardy jańǵyrtý» Ulttyq jobasy aıasynda aýqymdy rekonstrýktsııadan ótkizilip jatyr.
Pavlodar oblysyna jumys saparymen kelgen QR Premer-mınıstriniń orynbasary Qanat Bozymbaev Ekibastuz qalasynda aıaldap, TM-16 magıstralyndaǵy qurylys jumystarynyń barysymen tanysty.
TM-16 jylý magıstraly 1996 jyldan beri úzdiksiz paıdalanylyp keledi. 30 jylǵa jýyq ýaqyt ishinde jeliniń naqty tozý deńgeıi 90%-ǵa jetken. Resmı málimetterge súıensek, osy ýaqytqa deıin bul ýchaskede 28 zaqymdaný oqıǵasy tirkelse, onyń 12-si tek gıdravlıkalyq synaqtar kezinde anyqtalǵan. Máseleni túbegeıli sheshý maqsatynda bıyl kóktemde magıstraldy qaıta qurý jumystary bastaldy.
Óńirlik energetıka jáne turǵyn úı-kommýnaldyq sharýashylyq basqarmasynyń basshysy Erjan Imanzaıypovtyń dereginshe, joba aıasynda qalanyń negizgi jylý arterııasynyń TK-26L núktesinen TK-22K núktesine deıingi aralyǵy tolyq jańartylady.
- Ekibastuz qalasy boıynsha búginde jylý jelileriniń tozýy 88,6 % bolyp otyr. Jańǵyrtý baǵdarlamasy boıynsha qazir jalpy uzyndyǵy 4,2 shaqyrym bolatyn jylý jelileri jańartylyp jatyr. Uzyndyǵy bir shaqyrymǵa jýyq bul ýchaskede qubyrdyń shartty dıametri 630 mm-ge deıin keńeıtiledi. Bul qala tutynýshylaryn turaqty jylýmen qamtýǵa múmkindik beredi. Jobanyń jalpy smetalyq quny - 1 mlrd 123,2 mln teńge. Qurylys-montaj jumystaryn bıylǵy 20 tamyzǵa deıin, ıaǵnı jylytý maýsymy bastalǵanǵa deıin tolyq aıaqtaý josparlanǵan, - dep atap ótti ol.
Mamandardyń esebinshe, qubyr dıametrin ulǵaıta otyryp júrgizilgen modernızatsııa atalǵan ýchaskedegi yqtımal apattyq jaǵdaılardy 0%-ǵa deıin tómendetýge tıis. Bul óz kezeginde tehnologııalyq buzýshylyqtardy tolyq joıyp, qys mezgilinde qaladaǵy 358 tutynýshyny (onyń ishinde 100-den astam kóppáterli jáne 200-den astam jeke turǵyn úıler, sondaı-aq áleýmettik nysandar bar) jylý energııasymen turaqty qamtamasyz etedi.
«Energetıkalyq jáne kommýnaldyq sektorlardy jańǵyrtý» Ulttyq jobasy aıasynda oblysta qazirgi ýaqytta jalpy quny 21,6 mlrd teńge bolatyn 16 joba júzege asyrylyp jatyr. Al 2025-2027 jyldary jalpy sany 55 jobany iske asyrý kózdelgen. Barlyq jobaǵa jalpy somasy 131 mlrd teńge qarajat jumsalady. Óńir boıynsha jylý jelileriniń ortasha tozý deńgeıi qazirgi kúni 78,2 %, 2027 jyly ol 1,6 %-ǵa tómendeýi kerek.
Qanat Bozymbaev respýblıka boıynsha tozyǵy jetken kommýnaldyq jelilerdi jańartý jumystary Úkimettiń qatań baqylaýynda ekenin jetkizdi. TM-16 magıstralyndaǵy qurylys-montajdaý jumystaryn kórip, sapaǵa mán berýdi tapsyrdy. Ekibastuzdaǵy bul nysan - «Energetıkalyq jáne kommýnaldyq sektorlardy jańǵyrtý» ulttyq jobasy aıasynda aımaqta iske asyrylyp jatqan 4 iri jobanyń biri ekenine nazar aýdardy.
- Ár oblystaǵy jergilikti monopolıst kompanııalardyń jelilerdi jańartý jónindegi jeke ınvestıtsııalyq baǵdarlamalary bolýy tıis. Ol baǵdarlama bıýdjettik baǵdarlamalarmen úılesim taýyp otyrýy da mindet. Sáıkesinshe, qansha jeli tozǵany, qansha jerge jóndeý anyqtalady. Eń bastysy kommýnaldyq jelilerdi jańartý isinde alǵa jyljý bar. Endigi arada bul jumystardy tek údere túsýimiz kerek, - dep tapsyrdy Qanat Bozymbaev.
Úkimet basshysynyń orynbasary Pavlodar oblysyna jumys sapary aıasynda Aqsý men Pavlodar qalalaryndaǵy kommýnaldyq ınfraqurylymdy jańǵyrtý jumystarymen de tanysýy josparlanǵan. Sondaı-aq tústen keıin oblys ortalyǵynda Qanat Bozymbaevtyń tóraǵalyǵymen Jobalyq keńseniń kóshpeli otyrysy ótedi. Jıynǵa Pavlodar, Shyǵys Qazaqstan, Aqmola, Soltústik Qazaqstan, Qaraǵandy jáne Abaı oblystary ákimderiniń orynbasarlary, ortalyq memlekettik organdardyń ókilderi qatysady dep josparlanǵan.
Eske sala keteıik, elimizde jylýmen jáne elektr energııasymen qamtamasyz etý boıynsha ákimdikterge tapsyrma berildi.
