Ekibastuzda WhatsApp arqyly jurtty baıytamyn dep aldaǵan alaıaq áıel sottaldy

PAVLODAR. KAZINFORM - Ol ózi qurǵan alaıaqtyq shemasy boıynsha 23 adamdy aldap, jalpy somasy 26 mln teńgeden astam materıaldyq shyǵyn keltirgen.

Ekibastuzdyq turǵyn tez ári ońaı baıýdyń joldaryn izdep, ózgelerdiń esebinen aqsha tabýdy uıǵarǵan. Onyń qarajatty kóbeıtý jobalaryna qatysý tájirıbesi burynnan bolǵan. 2020 jyly áıel adam WhatsApp messendjerinde «LiveStyler», «Qarlyǵash», «Ýmnojaıka», «Shans» jáne t.b. chattaryn quryp, adamdardy paıda tabý úshin aqsha salýǵa shaqyrǵan.

- Ol ózi qurǵan shemanyń tabystylyǵynyń kórinisin jasaý úshin qatysýshylarǵa jańa qatysýshylar esebinen «dıvıdendter» tólegen. Qalǵanyn jeke qajettiligine jumsaǵan. Máselen, jábirlenýshiniń biri aqshasyn kóbeıtemin degen ýádege senip, «LiveStyler» tobyna qosylǵan. Uıymdastyrýshynyń qylmystyq nıetinen beıhabar ol 2021 jyldyń qańtar-qarasha aılary aralyǵynda alaıaq áıel kórsetken esepshotqa (onyń ózine, kámeletke tolmaǵan ulyna jáne onyń kúıeýine tıesili) 14 mln teńgege jýyq aqsha aýdarǵan. Bul somanyń 8,5 mln teńgesin qaskúnem jábirlenýshige adaldyq tanytý úshin qaıtaryp bergen. Qalǵan 5,4 mln teńgeni ózi ıemdengen. Qylmystyq áreketter nátıjesinde 23 jábirlenýshige jalpy somasy 26 mln teńgeden astam materıaldyq shyǵyn keltirilgen, - dep habarlardy Pavlodar oblystyq sotynyń baspasóz qyzmetinen.

Sot sottalýshynyń qylmystyq jaýapkershilikke alǵash ret tartylyp otyrǵanyn, qamqorlyǵynda kámeletke tolmaǵan balasy bar ekenin jáne aýyrlatatyn mán-jaılardyń joqtyǵyn eskere otyryp, oǵan 4 jylǵa bas bostandyǵynan shekteý jazasyn taǵaıyndady. Sondaı-aq jábirlenýshiler paıdasyna 26 mln teńge materıaldyq shyǵyn óndirildi. Jazany óteýden qasaqana jaltarǵan jaǵdaıda bas bostandyǵyn shekteý bas bostandyǵynan aıyrýmen aýystyrylady.

Eske sala keteıik, Pavlodar qalasynda polıtsııa qyzmetkerleri telefon alaıaqtaryna kómektesken otbasylyq jupty ustady.