Ekibastuzda toıda ýlanǵandar meıramhana ıesinen 6 mln teńge ótemaqy talap etip otyr
PAVLODAR. KAZINFORM — Bıylǵy sáýir aıynda toı ústinde tamaqtan ýlanyp qalǵan 16 adam Ekibastuzdaǵy «Grand Hall» meıramhanasynyń ıesinen jalpy somasy 6 mln teńge talap etip otyr. Olar jergilikti sotqa ujymdyq talap aryz túsirgen.
Bıylǵy sáýir aıynda Ekibastuzda toıǵa jınalǵan qonaqtar astan ýlanyp qalǵany týraly habarlaǵan edik. Oqıǵadan soń Ekibastuz qalalyq aýrýhanasyna jalpy sany 90-ǵa jýyq adam qaralǵan. Óńirlik densaýlyq saqtaý basqarmasynyń baspasóz qyzmetinen habarlaǵandaı, olardyń barlyǵynda tamaqtan ýlaný jáne bakterıaldy-ishek ınfektsııalary belgileri bolǵan.
Pavlodar oblysy boıynsha saýda jáne tutynýshylardyń quqyqtaryn qorǵaý departamenti basshysynyń orynbasary Nursulý Áýbákirovanyń aıtýynsha, tamaqtan ushynǵan 16 adam meıramhana ıesin sotqa berip, mateıaldyq jáne moraldyq shyǵyn óndirip almaq nıette.
— Bul azamattardyń barlyǵy ýlaný oqıǵasynan soń eki aptadaı statsıonarlyq em qabyldaǵan. Qymbat dári-dármek satyp alǵan. Aýrýǵa baılanysty jumysta bola almaı, tabystaryn joǵaltqan. Qazir sot isti qarap jatyr. Atalǵan toıda barlyǵy 94 adam tamaqtan ýlanǵany anyqtalyp otyr. Birazynan salmonelloz anyqtaldy. Meıramhana sol ýaqytta ruqsatsyz jumys istep turǵany da belgili bolǵan. Salmonelloz sonda jumys isteıtin qyzmetkerden juqqan, — deıdi N.Áýbákirova.
Qazirgi ýaqytta polıtsııa kásipkerlik nysanyn tekserip jatyr. Quqyq qorǵaýshylar atalǵan oqıǵada qylmystyq árekettiń bolý-bolmaýyn anyqtaıdy.
Buǵan deıin Pavlodarda kondıterlik fırmanyń quımaǵynan tórt adam ýlanyp qalǵany týraly da habarlaǵanbyz.
