Ekibastuzda temirjol stansasynyń jumysshysy vagon astynda janshylyp, kóz jumdy
PAVLODAR. KAZINFORM - Qaıǵyly oqıǵa boıynsha kóliktegi polıtsııa departamenti qylmystyq is qozǵaǵan. Qaıtys bolǵan adam temirjol stansasynda qozǵalys jyldamdyǵyn retteýshi bolyp jumys istegen.
Pavlodar oblysynyń Ekibastuz qalasyndaǵy temirjol stansasynda qaıǵyly oqıǵa boldy. Stansadaǵy qozǵalys jyldamdyǵyn retteýshini júk vagony basyp qalǵan. Er adam oqıǵa ornynda kóz jumǵan.
- 2026 jylǵy 10 qarashada Pavlodar stansasyndaǵy kóliktegi polıtsııa bólimimen abaısyzda adam ólimine ákep soqqan temirjol kóligi júrisi nemese olardy paıdalaný qaýipsizdigi qaǵıdalaryn buzý boıynsha qylmystyq is qozǵaldy. Qazirgi ýaqytta oqıǵanyń sebebi men mán-jaıyn anyqtaý boıynsha tıisti tergeý amaldary júrgizilip jatyr. Ózge aqparat QR Qylmystyq-protsestik kodeksiniń 201-babynyń talaptaryna sáıkes tergeý múddesine oraı jarııalaýǵa jatpaıdy, - dep habarlady kóliktegi polıtsııa departamentinen.
Kólik polıtsııasy azamattarǵa asa qaýipti aımaq sanalatyn temirjol kóligi obektilerinde bolǵan kezde jeke qaýipsizdik pen temirjoldaǵy tártip erejelerin qatań saqtaýdy eskertedi.
Eske sala keteıik, Pavlodarda poıyz qaǵyp ketken 22 jastaǵy jigit aýrýhanada kóz jumdy.
