Ekibastuzda salynatyn jańa zaýytta 500-den astam jumys orny ashylady
QR Premer-Mınıstri Álıhan Smaıylovtyń tóraǵalyǵymen Ekonomıkany jańǵyrtý máseleleri jónindegi memlekettik komıssııanyń kezekti otyrysy ótti, dep habarlaıdy Kazinform Úkimettiń baspasóz qyzmetine silteme jasap.
Otyrysqa qatysýshylar Pavlodar oblysynyń Ekibastuz qalasynda ferroqorytpa óndiretin zaýyt salý máselesin talqylady. Qýaty jylyna 80 myń tonna ferrosılıtsıı bolatyn joba 520-dan astam turaqty jumys ornyn qurýǵa jáne osy ónimniń Japonııa, Ońtústik Koreıa, AQSh, Túrkııaǵa jáne Eýropa elderine eksportyn ulǵaıtýǵa múmkindik beredi. Joba boıynsha ınvestıtsııa kólemi 113 mlrd teńgeden asady, paıdalanýǵa berý merzimi – 2025 jyl.
Sonymen qatar munaı ken oryndaryn odan ári ıgerýdiń ózekti máseleleri qozǵaldy. Óndiris tıimdiligin arttyrý, jumys oryndaryn qurý jáne qyzmet kórsetý kompanııalaryn qajetti jumys kólemimen qamtamasyz etý sııaqty baǵyttar qaraldy.
Sonymen qatar memlekettik komıssııa músheleri Jekeshelendirýdiń 2021-2025 jyldarǵa arnalǵan keshendi josparyn ózektendirý tásilderin talqylady. Atap aıtqanda, jobalardy qosý jáne alyp tastaý boıynsha jańartylǵan krıterııler, sondaı-aq birqatar aktıvti básekelestik ortaǵa berý jónindegi usynystar qaraldy. Máselen, Qazaq Air áýekompanııasyn básekelestik ortaǵa berý 2024 jylǵa josparlanyp otyr.
