Ekibastuzda rezeńke qaıyqpen muz qursaýynda qalyp qoıǵan balyqshylar qutqaryldy
PAVLODAR. KAZINFORM - Shańdaqsor kólinde rezeńke qaıyqqa mingen eki balyqshy qaýipti jaǵdaıǵa tap bolǵan. Muz kesekteri olardyń jaǵaǵa shyǵar jolyn jaýyp tastaǵan.
Bul týraly óńirlik Tótenshe jaǵdaılar departamentinen habarlady.
- Ekibastuz qalasy Solnechnyı kentindegi Shańdaqsor kólinde eki balyqshy qaýipti jaǵdaıǵa tap boldy. Olardyń rezeńke qaıyǵy muz kesekteriniń arasynda qysylyp qalǵan. Oǵan qosa borpyldaq muz jaǵalaýǵa shyǵatyn joldy jaýyp tastaǵan. Oqıǵa ornyna tótenshe jaǵdaı qyzmetkerleri jedel jetti. Arnaıy qural-jabdyqtardy qoldana otyryp, qutqarýshylar adamdardy sý aıdynynyń qaýipti ýchaskesinen evakýatsııalady, - dep málimdedi departamentten.
Balyqshylarǵa medıtsınalyq kómek qajet bolǵan joq.
Mamandar seń júrip jatqan ýaqytta sý aıdyndaryna shyqpaýdy eskertedi.
Eske sala keteıik, ShQO-da polıtseıler jolda densaýlyǵy nasharlap, ınsýlt alǵan azamatty qutqardy.
