Ekibastuzda prokýrorlar aýyl sharýashylyǵy jerleriniń zańsyz berilýiniń jolyn kesti
PAVLODAR. KAZINFORM — Ekibastuz qalasynyń prokýratýrasy aýyl sharýashylyǵy maqsatyndaǵy jer ýchaskelerin berý boıynsha ótkizilgen konkýrs kezinde zań buzýshylyqtardy anyqtaǵan.
Tekserý barysynda konkýrsqa qatysýshylardyń keıbiri aýyl sharýashylyǵy tehnıkasynyń jáne bilikti mamandardyń bar ekendigi týraly shyndyqqa sáıkes kelmeıtin málimetter usynǵany belgili boldy. Bul konkýrstyq ótinimderdi baǵalaý nátıjelerine áser etken.
— Konkýrs qorytyndylaryn zerdeleý kezinde 4 lot boıynsha zań buzýshylyqtar anyqtalyp, sonyń saldarynan jalpy kólemi 2 myń gektardan asatyn jer ýchaskeleri zańsyz bólingen. Atap aıtqanda, eki sharýa qojalyǵy konkýrstyq qujattamada birdeı aýyl sharýashylyǵy tehnıkasyn jáne eńbek resýrstary týraly birdeı málimetterdi kórsetken, — dep habarlady Pavlodar oblystyq prokýratýrasynan.
Prokýratýranyń narazylyǵy boıynsha jer komıssııasynyń sheshimimen atalǵan lottar boıynsha konkýrs nátıjeleri joıyldy. Jer ýchaskeleri qaıtadan konkýrsqa shyǵaryldy.
Eske sala keteıik, Aqmola oblysynda prokýrorlardyń yqpalymen 788 gektar jer memleketke qaıtaryldy.
