Ekibastuzda oqý jylynyń basynda Balalar shyǵarmashylyǵy ortalyǵy ashylady
ASTANA. KAZINFORM - Ekibastuzda Prezıdent tapsyrmasy boıynsha oqý jylynyń basynda jańa Balalar shyǵarmashylyǵy ortalyǵy paıdalanýǵa beriledi.
Pavlodar oblysyna jumys sapary aıasynda QR Premer-Mınıstri Oljas Bektenov Ekibastuzdaǵy jańa Balalar shyǵarmashylyǵy saraıynyń qurylys barysymen tanysty.
Aýdany 7,2 myń sharshy metr bolatyn zamanaýı ortalyq balalardy sapaly qosymsha bilimmen qamtýdy keńeıtý maqsatynda salynyp jatyr.
Balalar shyǵarmashylyǵy saraıy eń joǵary tehnologııalyq quraldarmen jabdyqtalady. Munda ǵaryshtyq radıobaılanys klýby, robototehnıka stýdııasy, ónerkásiptik sáýlet jáne dızaın stýdııasy, ǵylymı-bıologııalyq zerthana, kovorkıng-aımaq, dybys jazý stýdııasy, fotografııa akademııasy, kórkem-estetıkalyq sheberhana, sportzal jáne t.b. ashylady dep kózdelip otyr.
Búgingi tańda ǵımarattyń irgetasy quıylyp, eń astyńǵy qabat pen metall qurylymdar ornatyldy. Bıylǵy kúzde paıdalanýǵa berý josparlanǵan. Premer-Mınıstr ákimdikke jobanyń ýaqtyly iske qosylýyn qamtamasyz etýdi tapsyrdy.
«Bul – Memleket basshysynyń tikeleı tapsyrmasy boıynsha salynyp jatqan obekt, sondyqtan sapasy da óte joǵary deńgeıde bolýy kerek. Mundaı ortalyqtar balalardyń bos ýaqytyn qamtyp, olardyń shyǵarmashylyq qabiletterin damytýǵa, qosymsha bilim alýyna múmkindik beredi. Ortalyq iske qosylǵannan keıin qalada qosymsha bilimmen qamtý deńgeıi 70%-dy quramaq. Joba meniń jeke baqylaýymda bolady», - dedi Oljas Bektenov.
