Ekibastuzda ne sebepti tótenshe jaǵdaı jarııalandy

 PAVLODAR. KAZINFORM - Tótenshe jaǵdaı Maıqaıyńǵa sý jetkizetin úlken qubyrdaǵy apattyń saldaryn joıý maqsatynda jarııalandy. Jeliniń zaqymdalǵan bólikteri qala aýmaǵynda ornalasqan.

Atalǵan sý jelisi 1996 jyly salynǵan jáne búgingi tańda aıtarlyqtaı tozyǵy jetken.

Qubyr «Ekibastuz qalalyq sý arnasy» kommýnaldyq uıymynyń balansynda tur. 

Ashyq NQA portalynda Jergilikti aýqymdaǵy tehnogendik sıpattaǵy tótenshe jaǵdaı jarııalaý týraly Ekibastuz qalasy ákiminiń sheshimi jaryq kórdi. 

Onda tehnogendik sıpattaǵy tótenshe jaǵdaıdy joıýǵa baǵyttalǵan is-sharalarǵa qala ákiminiń orynbasary Erjan Salhanovtyń jaýap beretindigi aıtylǵan.

Pavlodar oblysy ákiminiń baspasóz qyzmetinen habarlaǵandaı, tótenshe jaǵdaı qubyrdaǵy aqaýdy jóndeý jumystary úshin bıýdjetten qarajat bólý maqsatynda jarııalanyp otyr.

«Maıqaıyń kenti men Bogatyr kómir kenishine sý jetkizetin qubyrdaǵy aqaýdy jóndeý jumystary 21 aqpannan jalǵasýda. Barlyǵy 143 adam jáne 60 birlik mamandandyrylǵan tehnıka jumyldyrylǵan. Oqıǵa ornynda jedel shtab uıymdastyrylǵan» dep málimdedi baspasóz qyzmetinen.

Eske sala keteıik, Ekibastuzdan Maıqaıyń kentine aýyzsý jetkizetin úlken qubyr jaryldy.  

Buǵan deıin Maıqaıyńda tehnogendik sıpattaǵy tótenshe jaǵdaı jarııalandy.