Ekibastuzda majarlyq soǵys tutqyndarynyń zıraty tabyldy
ASTANA. KAZINFORM – Ekibastuzdaǵy «Bogatyr» kómir kenishiniń aýmaǵynan 1918 jyly jerlengen majarlyq soǵys tutqyndarynyń zıraty tabyldy. Bul týraly Kazinform agenttiginiń tilshisine Pavlodar oblysy boıynsha arheologııalyq ekspedıtsııalarǵa qatysýshy Ivan Trýhın habarlady.
Trýhınniń aıtýynsha, tabylǵan súıekter HH ǵasyrdyń basynda Ekibastuz kómir shahtalarynda kenshi retinde jumys istegen majarlyq soǵys tutqyndaryna tıesili. Qazir jerleý ornynda arheologter jumys istep jatyr. Olar súıekterdi anyqtap, tarıhı qujattardy zertteýmen aınalysý ústinde.
— Bul shaǵyn ǵana zırat, 20-30 beıit bar, qulpytastarynyń keıbiri búlingen, biraq ekeýindegi jazýdy oqı aldyq. Qazir biz «AMANAT» partııasymen birge zertteý jumystaryn bastaǵymyz keledi. Vengrııa elshiligimen baılanys ornatpaqpyz. Múmkin týystarynyń arasynda kózi tiriler bar shyǵar. Eger olar qyzyǵýshylyq tanytsa, bul zıratty abattandyrýǵa bolady, — dedi arheolog.
Mamannyń aıtýynsha, qazirgi sátte zertteýdiń qaýipsizdigin qamtamasyz etý jáne tabylǵan tarıhı qundylyqtardy saqtaý úshin anyqtalǵan qabirdiń mańynda jer qoınaýyn ıgerý jumystary ýaqytsha toqtatylǵan.
Aıta keteıik, buǵan deıin kontslager tutqynynda bolǵan atyraýlyq keıýanaǵa merekelik medal berilgen edi.