Elimizde 21 ýaqytsha saqtaý qoımasynyń jumysy toqtatyldy
ASTANA. KAZINFORM — Qazaqstan boıynsha ýaqytsha saqtaý qoımalarynyń qyzmetin tekserý kezinde keden zańnamasynyń júıeli buzýshylyqtary anyqtaldy. Prokýrorlyq qadaǵalaý sharalary nátıjesinde 21 qoımanyń jumysy toqtatylyp, ıelerine qatysty 23 ákimshilik materıal toltyryldy.
Bas kólik prokýratýrasynyń habarlaýynsha, taldaý barysynda qoımalardyń tizilimge engizý talaptaryna sáıkes kelmeıtini belgili boldy. Atap aıtqanda, keıbirinde temirjol joldary, beton tósemeler, baqylaý-ótkizý pýnktteri, beınebaqylaý kameralary men qorshaýlar bolmaǵan.
Prokýrorlyq qadaǵalaý aktisi boıynsha zań buzýshylyqtarǵa jol bergen qoımalardyń qyzmeti toqtatyldy.
Sonymen qatar Memlekettik kirister komıteti aýmaqtyq bólimshelerge qoımalardy kásibı deńgeıge kóterý jáne olardyń qyzmetin baqylaýdy jetildirý jóninde usynystar berdi.
Ýaqytsha saqtaý qoımalarynyń jumysyn durys uıymdastyrý júkterdi óńdeý jyldamdyǵyna, taýar aınalymynyń úzdiksizdigine, tasymaldanatyn taýarlardyń saqtalýyna jáne eldiń ınvestıtsııalyq tartymdylyǵyna tikeleı áser etedi.
Eske salaıyq, buǵan deıin Qazaqstan dári jetkizýge arnalǵan óz qoımalaryn salatynyn jazǵan edik.
