Ekibastuzda eki stýdentti áldebireýler aıaýsyz uryp-soqqan

PAVLODAR. KAZINFORM - Ekibastuzda 2007 jáne 2008 jylǵy eki stýdent aıaýsyz soqqyǵa jyǵyldy. Qazirgi ýaqytta olar jergilikti aýrýhananyń jansaqtaý bólimshesinde jatyr.

Bul týraly Instagram-da zardap shekken jigitterdiń biriniń týysqany habarlady.

«Biz meniń jıenim men onyń dosyn №21 mekteptiń janynan, jartylaı esinen tanyp jatqan jerinen taptyq. Olardy 29 qyrkúıek kúni keshkilik áldebireýler aıaýsyz soqqyǵa jyqqan. Bul qylmysty jasaǵan kúdiktilerdi kózi shalǵandar bolsa, habarlasýdy ótinemiz», dep jazdy týysy.

Pavlodar oblysynyń bilim berý basqarmasy zardap shekken qos stýdenttiń Ekibastuzdaǵy kolledjde oqıtynyn rastady. Olar qalalyq aýrýhanaǵa jetkizilgen.

Óńirlik polıtsııa departamentiniń baspasóz qyzmeti qos kámeletke tolmaǵan azamattyń densaýlyǵyna qasaqana aýyrlyǵy ortasha zııan keltirý faktisi boıynsha sotqa deıingi tergeý bastalǵanyn habarlady.

«Kúdikti ustalyp, polıtsııaǵa jetkizildi. Qazirgi ýaqytta oqıǵanyń mán-jaıy anyqtalyp jatyr», - dep málimdedi baspasóz qyzmetinen.

Soqqyǵa jyǵylǵannyń biri Ekibastuzǵa qarasty Solnechnyı kenti ákiminiń uly ekeni anyqtaldy.

Oblystyq densaýlyq saqtaý basqarmasynyń baspasóz qyzmetinen habarlaǵandaı, eki stýdent de bastarynan qatty soqqy alǵan. 2008 jylǵy azamatta ashyq bas súıek-mı jaraqaty bar, jaq súıekteri synǵan. Buǵan qosa keýde tusynda, betinde jaraqattary bar. Jaǵdaıy turaqty aýyr. Qazir ol Ekibastuz qalalyq aýrýhanasynyń jansaqtaý bólimshesinde jatyr.

Al 2007 jylǵy bozbala atalǵan aýrýhananyń jaraqat aýrýlar bólimshesine ornalastyrylǵan. Odan jabyq bas súıek-mı jaraqaty anyqtaldy. Mıy shaıqalyp, kózine zaqym kelgen.

Eske sala keteıik, Pavlodarda kolledj stýdenti oqytýshyǵa pyshaq jaraqatyn saldy.