Ekibastuzda qatty burshaq pen daýyldan keıin tótenshe jaǵdaı rejımi jarııalanýy múmkin
ASTANA. KAZINFORM — Ekibastuzda 19 shildede bolǵan qatty burshaq pen ekpindi jelden keıin jergilikti aýqymdaǵy tabıǵı sıpattaǵy tótenshe jaǵdaı rejımin jarııalaý josparlanyp otyr, dep habarlaıdy Kazinform agenttiginiń tilshisi.
Tıisti ákimdik qaýlysynyń jobasy qoǵamdyq talqylaý úshin «Ashyq NQA» portalynda jarııalandy.
Qujatqa sáıkes, tótenshe jaǵdaı rejımi 2026 jylǵy 19 shildede bolǵan qaýipti gıdrometeorologııalyq qubylystarǵa baılanysty engizilmek. Qaýly jobasyn Ekibastuz qalasy ákiminiń apparaty ázirlegen.
Qujatta tótenshe jaǵdaı rejımin engizýdiń maqsaty qoldanystaǵy zańnamaǵa sáıkes tabıǵat apatynyń saldaryn joıýǵa qajetti sharalardy qabyldaý ekeni kórsetilgen.
Óńirdegi qolaısyz aýa raıynyń saldary týraly Ekibastuz qalasynyń ákimi Aıan Beısekın áleýmettik jelidegi paraqshasynda jazdy.
Onyń aıtýynsha, qatty burshaq pen ekpindi jel saldarynan Qudaıkól aýylyndaǵy ondaǵan turǵyn úıge, áleýmettik nysandar men ınjenerlik ınfraqurylymǵa zaqym kelgen.
Ákimniń málimetinshe, alǵashqy kúnnen bastap oqıǵa ornynda barlyq jaýapty qyzmetter jumys istep jatyr. Qazirgi ýaqytta elektr jáne sýmen jabdyqtaý júıelerin qalpyna keltirý, nysandarǵa tehnıkalyq tekserý júrgizý jáne keltirilgen shyǵyn kólemin baǵalaý jumystary jalǵasyp jatyr.
Eske salaıyq, buǵan deıin Pavlodar oblysynda burshaq pen qatty jelden keıin alty turǵyn medıtsınalyq kómekke júgingeni habarlanǵan bolatyn.
