Ekibastuzda erteńnen bastap kópqabatty úılerge jylý beriledi

2 qazandaǵy jaǵdaı boıynsha Ekibastuz jylý elektr ortalyǵynda 2 qazandyq jumys istep tur, dep habarlaıdy QazAqparat. 

Pavlodar oblysynyń ákimi Asaıyn Baıhanov Ekibastuzǵa jylý berý boıynsha qurylǵan jedel shtabtyń kezekti otyrysyn ótkizdi. 

Abaı, Energetıkter, Kenshiler kósheleri (Abaı kóshesinen B. Momyshuly kóshesine deıin), Pishembaev kóshesi (M. Júsip kóshesinen Abaı kóshesine deıin), Máshhúr Júsip kóshesi (JEO-nan TJ vokzalyna deıin) jáne Áýezov kóshesi (Energetıkter kóshesinen Qonaev kóshesine deıin) boıyndaǵy 8 jylý magıstrali toltyrylyp, iske qosyldy.

3-8 qazan aralyǵynda kópqabatty úılerge jylý beriledi. Alǵashqy bolyp № 1, 3, 4, 5A, 5B, 6, 8, 9, 15, 19, 20, 22, 30, 31 shaǵynaýdandardyń kópqabatty úıleri jylý qabyldaıdy.

Kún saıyn 140 úıdi jylýǵa qosý kózdelip otyr. 

9-10 qazan aralyǵynda jeke sektordy jylýmen qamtamasyz etý josparlanǵan. 

Qaladaǵy 90 áleýmettik nysannan 40 nysan qosyldy. 3 qazanda qalǵan 50 nysanǵa jylý berilýge tıis. 

Óńir basshysy Ekibastuz qalasynyń kommýnaldyq qyzmetterine jylýdy kezeń-kezeńimen iske qosýdy baqylaýda ustaýdy jáne qazan aıynyń sońyna deıin buryn jóndeý jumystary júrgizilgen jylý qubyrlaryn oqshaýlaýdy tapsyrdy.