Ekibastuzda er adamnyń ekpeden keıin qaza bolýyna baılanysty tekseris bastaldy

PAVLODAR. KAZINFORM — QR Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Ekibastuzdaǵy jeke klınıkada ekpe alyp, keıin qaıtys bolǵan 40 jastaǵy er adamnyń ólimine baılanysty tekserýdi bastady.

Bul týraly Medıtsınalyq jáne farmatsevtıkalyq baqylaý komıtetiniń resmı saıtynda habarlandy. 

— Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıteti Pavlodar oblysy boıynsha departamenti táýelsiz sarapshylardy (terapevt dáriger, anestezıolog-reanımatolog, travmatolog) tarta otyryp, Ekibastuz qalasy polıtsııa basqarmasynyń tergeý bólimi qaýlysynyń negizinde patsıenttiń marshrýty boıynsha medıtsınalyq uıymdarda tekserýler júrgizip jatyr, — dep málimdedi komıtetten.

Tekserý barysynda zańbuzýshylyqtar anyqtalǵan jaǵdaıda materıaldar quqyqtyq baǵa berý jáne protsestik sheshim qabyldaý úshin Ekibastuz qalasy polıtsııa basqarmasynyń tergeý bólimine joldanatyn bolady.

Buǵan deıin Ekibastuz turǵyny aıaǵyna salynǵan ınektsııadan keıin qaıtys bolǵany týraly jazǵanbyz. 40 jastaǵy er adam qyrkúıek aıynda jeke klınıkanyń kómegine júgingen. Arada bir apta ótkende er adam aıaq astynan dúnıeden ozǵan.