Ekibastuzda emdelýshiniń dostary dáriger men medbıkeni soqqyǵa jyqqan
PAVLODAR. KAZINFORM — Polıtsııanyń málimetinshe, dáriger men medbıke túrli jaraqattarmen aýrýhanaǵa jatqyzylǵan. Kúdiktiler ustaldy.
Belgili bolǵandaı, 12 sáýir kúni Ekibastuz qalasyndaǵy travmatologııalyq pýnktke jergilikti turǵyn medıtsınalyq kómek alýǵa júgingen. Onymen birge ishimdikke sylqııa toıyp alǵan eki dosy kelgen. Olar ózderin agressıvti ustap, medıtsına qyzmetkerleriniń eskertýlerine qulaq aspaǵan.
— Bólmeden shyǵýdan bas tartqan olar dárigerge judyryq jumsaǵan. Arasha túspek bolǵan medbıke de soqqyǵa jyǵylyp, dene jaraqatyn alǵan. Qazirgi ýaqytta zardap shekken eki medıtsına qyzmetkeri de alǵan jaraqattarymen aýrýhanaǵa jatqyzyldy, — dep habarlady Pavlodar oblystyq polıtsııa departamentinen.
Dárigerlerdi soqqyǵa jyqqan úsh dos ustalyp, ýaqytsha ustaý ızolıatoryna qamaldy. Medıtsına qyzmetkerlerine qatysty zorlyq-zombylyq kórsetý deregi boıynsha sotqa deıingi tergeý amaldary bastaldy.
Eske sala keteıik, 2026 jylǵy 7 naýryzdan bastap Qazaqstanda medıtsına qyzmetkerlerin qorǵaýǵa baǵyttalǵan qatań zańnamalyq sharalar kúshine endi. Oǵan sáıkes, dárigerlerge, feldsherlerge jáne jedel járdem júrgizýshilerine shabýyl jasaǵandar 12 jylǵa deıin bas bostandyǵynan aıyrylýy múmkin.
