Ekibastuzda ekinshi synyp oqýshysy káriz qudyǵyna qulap ketti
PAVLODAR. KAZINFORM - Balany joǵary synypta oqıtyn úsh bala baıqap qalyp, shyǵaryp alǵan. Ol qudyq ishinde 3 saǵattaı sýǵa malshynyp turyp qalǵan.
VITA erikti izdeý jasaǵynyń ókilderi habarlaǵandaı, ekinshi synypta oqıtyn er bala búgin úıinen 12:40-ta shyǵyp, joǵalyp ketken. Muǵalim balanyń mektepke kelmegenin aıtyp, dabyl qaqqan soń eriktiler izdeı bastaıdy.
«Bizdiń volonterler aýlalar men kameralardy tekserip, jolshybaı kezdesken adamdardyń bárinen surap kórdi. Alaıda taba almadyq. Sóıtsek, ol jolda ashyq turǵan káriz qudyǵyna qulap, birneshe saǵat tizeden keletin sýda turǵan. Qudyqtyń tereńdigi shamamen 2 metrdeı», dep habarlady izdeýshiler.
Er balanyń kómekke shaqyrǵan daýysyn eshkim estimegen. Amaly quryǵan soń joǵaryǵa qolyndaǵy rıýkzagyn laqtyryp jiberedi. Rıýkzakty №21 mekteptiń 8-synyp oqýshylary Omar Saǵyndyq, Nurasyl Jańajyl, Mansur Erdáýkeuly baıqap qalyp, ábden jaýraǵan balany shyǵaryp alǵan.
Óńirlik densaýlyq saqtaý basqarmasynan habarlaǵandaı, keshki saǵat besterde balanyń úıinen jedel járdemge shaqyrtý túsken. Dárigerler balanyń mıy shaıqalǵan jáne qatty tońyp qalǵan dep otyr. Zardap shegýshini statsıonarǵa jatqyzý josparlanýda.
