Ekibastuzda «Derekterdi óńdeý ortalyqtary alqaby» qurylysy boıynsha jumystar bastaldy
PAVLODAR. KAZINFORM - «Derekterdi óńdeý ortalyqtary alqabyn» (DÓOA) salý josparlanǵan ýchaske qorshalyp, qazirgi ýaqytta aýmaqty josparlaý jáne jer jumystary júrgizilip jatyr. Jalpy alǵanda, jumystardy tolyǵymen 2033 jylǵa qaraı aıaqtaý kózdelip otyr.
Pavlodar oblysy ákimdiginiń dereginshe, joba kezeń-kezeńimen iske asyrylady. 2027 jyldyń alǵashqy jartysynyń sońyna deıin qajetti ınjenerlik ınfraqurylymdy tartý jáne qýattylyǵy 125 MVt bolatyn alǵashqy derekterdi óńdeý ortalyǵyn salý josparlanǵan. 2029-2033 jyldar aralyǵynda kelesi nysandar kezeń-kezeńimen paıdalanýǵa beriledi. Barlyq kezeńder aıaqtalǵannan keıin klasterdiń jalpy qýaty 1 GVt-qa jetip, onyń aýmaǵynda zamanaýı 10-ǵa deıin derekterdi óńdeý ortalyǵy ornalasady.
- Joba Memleket basshysy Qasym-Jomart Toqaevtyń tapsyrmasy boıynsha júzege asyrylýda jáne álemdik jetekshi gıperskeılerlerdiń qatysýymen Eýrazııa keńistigindegi eń iri tsıfrlyq klasterlerdiń birin qurýdy kózdeıdi. Jobany júzege asyrý úshin 177 gektar jer telimi bólindi. Onyń ishinde 124,4 gektar alǵashqy kezeńdegi nysandardy salýǵa arnalǵan. Sonymen qatar MAES-1 stantsııasy aýmaǵynda tsıfrlyq klasterdi odan ári keńeıtý maqsatynda jalpy kólemi shamamen 1300 gektar bolatyn qosymsha jer ýchaskeleri rezervke qoıyldy, - dep habarlady óńir ákimdiginen.
Q.Sátbaev atyndaǵy kanaldan sý alý núktesi anyqtalyp, sýmen jabdyqtaý nysandarynyń jobalaý jumystary júrgizilip jatyr. Keshenniń sharýashylyq-turmystyq qajettilikteri úshin táýliktik sý tutyný kólemi 2300 tekshe metrdi quraıdy. Sondaı-aq órt qaýipsizdigin qamtamasyz etý úshin de qajetti sý kólemi qarastyrylǵan.
Jobanyń alǵashqy kezeńin elektrmen jabdyqtaý úshin qýattylyǵy 215 MVt bolatyn qoldanystaǵy qosalqy stantsııa paıdalanylady. Bul salynyp jatqan derekterdi óńdeý ortalyǵynyń qajettilikterin tolyq qamtamasyz etýge múmkindik beredi.
Qazirgi ýaqytta alańda daıyndyq jumystary bastaldy. Aýmaqty josparlaý, jer jumystary júrgizilýde jáne qorshaý ornatyldy.
- «Derekterdi óńdeý ortalyqtary alqabyn» qurý Qazaqstannyń tsıfrlyq ekonomıkasyn damytýdaǵy mańyzdy qadam bolady. Joba halyqaralyq deńgeıdegi zamanaýı tsıfrlyq ınfraqurylymdy qalyptastyrýǵa, iri tehnologııalyq seriktesterdi tartýǵa jáne elimizdiń tsıfrlyq hab retindegi pozıtsııasyn nyǵaıtýǵa múmkindik beredi. Bizdiń mindetimiz - barlyq qajetti ınfraqurylymdy ýaqytyly daıyndap, týyndaıtyn máselelerdi jedel sheshý, - dep atap ótti Pavlodar oblysynyń ákimi Asaıyn Baıhanov.
Jobany iske asyrý kezeńinde 1500-den astam ýaqytsha jumys orny jáne nysandar paıdalanýǵa berilgennen keıin 250-den astam turaqty jumys orny ashylady dep kútilip otyr. Sonymen qatar joba Qazaqstannyń tsıfrlyq ekonomıkasyn damytý men óńirge joǵary tehnologııalyq ınvestıtsııalar tartýdyń negizgi draıverleriniń birine aınalady.
Buǵan deıin Ekibastuzda 1 300 gektardan astam aýmaqta derekter ortalyǵy qurylatyny týraly jazǵanbyz.
Jobaǵa «Qazaqtelekom» kompanııasy jaýaptandy.
Jyl basynda «Derekterdi óńdeý ortalyqtary alqaby» jobasynyń damý barysy qaraldy.
Oljas Bektenov derekter ortalyqtary alqaby jobasynyń iske asýyn jedeldetýdi tapsyrǵan bolatyn.
