Ekibastuzda bir táýlikte 85 quqyq buzýshylyq tirkeldi
ASTANA. KAZINFORM — Ekibastuzda bir táýlikte 85 quqyq buzýshylyqtyń joly kesildi, dep habarlaıdy Polisia.kz.
Ótken táýlikte Ekibastuz qalasynda polıtseıler 85 quqyq buzýshylyqtyń jolyn kesti. Onyń basym bóligi jol qozǵalysy erejelerin buzýǵa qatysty.
Óńirde «Zań men tártip» qaǵıdatyn iske asyrý baǵytyndaǵy jumystar jalǵasýda. Patrýldik polıtsııa rotasynyń qyzmetkerleri qoǵamdyq tártip pen jol qaýipsizdigin qamtamasyz etý maqsatynda kún saıyn kezekshilikke túsedi. Negizgi nazar krımınogendik ahýaly kúrdeli aýmaqtar men turǵyndar kóp shoǵyrlanatyn oryndarǵa aýdarylady.
Polıtsııa málimetinshe, patrýldik qyzmet táýlik boıy jumys istep, turǵyndarmen turaqty baılanysta bolady. Inspektorlar jol qozǵalysy erejeleriniń saqtalýyn baqylaýmen qatar, oqıǵalarǵa jedel áreket etedi, qoǵamdyq oryndardaǵy tártipti qadaǵalaıdy jáne qylmystardy izin sýytpaı ashýǵa úles qosady.
Táýlik ishinde tirkelgen 85 quqyq buzýshylyqtyń 75-i jol qozǵalysy erejelerin buzýǵa qatysty. Olardyń qatarynda belgilengen jyldamdyqty asyrý, jaıaý júrginshilerge jol bermeý, baǵdarshamnyń tyıym salynǵan sıgnalyna ótý jáne kólikti mas kúıinde basqarý derekteri bar.
— Máselen, Ekibastuz qalasyndaǵy Abaı kóshesinde polıtseıler Mazda-626 avtokóligin toqtatqan. Medıtsınalyq kýálandyrý nátıjesinde júrgizýshiniń alkogoldik masań kúıde bolǵany rastaldy. Osyndaı quqyq buzýshylyqqa mototsıkl júrgizýshisi de jol bergen. Eki kólik te arnaıy turaqqa qoıylyp, tıisti materıaldar sotqa joldandy, — dedi Ekibastuz qalasy polıtsııa basqarmasy ákimshilik polıtsııa bóliminiń bastyǵy Rýslan Súleımenov.
Polıtsııa ókilderi óńirde quqyq buzýshylyqtarǵa «nóldik tózimdilik» qaǵıdaty júzege asyrylyp jatqanyn atap ótti.
Budan buryn Ekibastuzda 40-qa jýyq maldy urlady degen kúdikpen tórt adam ustalǵanyn jazǵanbyz.
