Ekibastuzda balyq aýlaýǵa shyqqan eki adam kólikpen muz astyna túsip ketti
PAVLODAR. KAZINFORM - Qaıǵyly oqıǵa keshe keshke bolǵan. Kólik jaǵadan shamamen 700-800 metr jerdegi muz oıyǵyna qulap ketken.
Oqıǵa Ekibastuzdyń GRES-2 stansasy aýmaǵynda, «Shandyqsor» jasandy sý qoımasynda bolǵan. 1978 jáne 1976 jylǵy eki er adam balyq aýlaýǵa shyǵyp, jeke kólikpen muz astyna túsip ketken.
«22 naýryz kúni saǵat 20:33-te Ekibastuz qalasy mańyndaǵy «Shandyqsor» sý qoımasynda eki adamnyń jeke kólikpen muz astyna túsip ketkeni týraly habarlama tirkeldi. Olar balyq aýlaýǵa shyqqan, jaǵadan shamamen 700-800 metr uzaǵanda muz oıylyp, kólik sý astyna ketken. Olardyń Pavlodar qalasynan kelgendigi anyqtaldy», - dep habarlady óńirlik tótenshe jaǵdaılar departamentiniń baspasóz qyzmetinen.
Búgin tańerteń Ekibastuz qalasynyń qutqarýshylary izdestirý-qutqarý jumystaryna kiristi. 7 adam, 2 birlik tehnıka jáne 1 júzý quraly jumyldyrylǵan. Qutqarýshylar balyqshylardyń múrdelerin sýdan alyp shyqty.
Tótenshe jaǵdaı qyzmetkerleri qazir muz óte juqa ekenin jáne oǵan shyǵý qaýipti ekenin eskertedi.
