Ekibastuzda balalardyń zamanaýı shyǵarmashylyq ortalyǵy ashyldy
EKІBASTUZ. KAZINFORM - Ekibastuzdaǵy «Samǵaý» ortalyǵy zamanaýı qural-jabdyqtarmen jasaqtalǵan jáne munda erekshe kútimdi qajet etetin balalar úshin barlyq jaǵdaı qarastyrylǵan. Aýmaǵy 7 myń sharshy metrden asatyn keshen tolyǵymen demeýshiler bólgen qarjyǵa turǵyzyldy, dep habarlaıdy Kazinform agenttiginiń tilshisi.
Ortalyqtyń qurylysy 2023 jyldyń qazanynda bastalǵan bolatyn. Qazir jumystar tolyq aıaqtaldy. Úsh qabatty ǵımaratta dárister 12 baǵytta júrgizilmek. Atap aıtqanda jetkinshekter – IT, mýzyka, beıneleý óneri, robototehnıka, landshaftty dızaın salalarynda bilim alady. Munda dybys jazý stýdııasy, telestýdııa men fotoakademııadan turatyn tolyqqandy medıaortalyq qurylǵan. Balalar bımen aınalysyp, teatr sheberhanalarynda tálim alady, keramıkamen jumys istep, arnaıy jasalǵan «jasyl zerthanada» ósimdikterdiń kútimimen aınalysady.
Ǵımarattyń birinshi qabatynda repetıtsııa zaly men 275 oryndyq úlken kórermen zaly bar. Budan bólek, ortalyqta psıhologııalyq-pedagogıkalyq qoldaý kabıneti men trenajer zaly, ústel tennısi men emdik deneshynyqtyrý aýmaǵy qarastyrylǵan.
- Biz búgin memleket basshysynyń tikeleı tapsyrmasymen turǵyzylǵan balalardyń shyǵarmashylyq ortalyǵyn saltanatty túrde ashtyq. Jańa ǵımaratta 9 myń bala dáris alý arqyly Ekibastuzdaǵy jetkinshekterdiń qosymsha bilim alý kórsetkishin 30 paıyzdan 70 paıyzǵa deıin arttyrady. Ortalyq túrli baǵytta bilimdi jetildirýge múmkindik beretin zamanaýı tehnologııalyq quraldarmen jabdyqtalǵan. Atap aıtar bolsaq, ósimdikti óndirýge múmkindik beretin gıdroponıkaly ǵylymı-bıologııalyq zerthana, landshaftty arhıtektýra men florıstıka, kıim tigý tehnologııasy men sándi dızaınǵa negizdelgen feshn-ındýstrııa sekildi jańa baǵyttar kóńilge maqtanysh sezimin uıalatady. Men «Samǵaý» shyǵarmashylyq ortalyǵynyń árbir jetkinshek úshin óz talantyn pash etip, bar múmkindigin kórsetip, bolashaqqa erkin jospar qura alatyn ortaǵa aınalaryna senimdimin, - dep málimdedi Pavlodar oblysynyń ákimi Asaıyn Baıhanov.
Ǵımarat qurylysy tolyǵymen demeýshilerdiń esebinen júzege asyryldy. Bul taý-ken óndirisimen aınalysatyn qos iri kompanııa. Olardyń biri jobany júzege asyrý úshin 4,6 mıllıard teńge bólgen KAZ Minerals Toby.
- Balalar shyǵarmashylyqpen aınalyssyn, bilim alsyn, talanttaryn ashsyn desek olarǵa jaqsy jaǵdaı jasalý kerek. Sol sebepti KAZ Minerals Toby atalǵan jobany júzege asyrýǵa erekshe qoldaý kórsetti. Bizdiń kompanııa jas urpaqtyń damýyna erekshe kóńil bólip keledi, jáne bul jobany biz qalanyń ınfraqurylymyn damytýǵa qosqan úlesimiz ǵana emes, sonymen birge bolashaqqa da qosqan úlesimiz dep bilemiz. Biz jańa ortalyq Ekibastuzdaǵy barlyq talantty jetkinshekterdiń basyn qosatyn orynǵa aınalaryna senemiz, - deıdi KAZ Minerals Bozshakol kompanııasy bas dırektorynyń mindetin atqarýshy Nurlybek Qystaýbaev.
Balalardyń shyǵarmashylyq ortalyǵy demalyssyz jumys isteıdi. Dáristerdiń barlyǵy tegin. Aldaǵy ýaqytta jańa nysannyń jumysy men kútimine Ekibastuz qalasynyń bilim bólimi jaýap beretin bolady.