Ekibastuzda bala ólimine qatysty qylmystyq is qozǵaldy
PAVLODAR. KAZINFORM — Áleýmettik jelide ekibastuzdyq ananyń Memleket basshysyna joldaǵan beıne úndeýi tarady. Ol 1 jas 9 aı tolǵan jetkinshegi dárigerlerdiń qateliginen kóz jumǵanyn, soǵan oraı kináli medıtsına qyzmetkerlerin jazalaýdy suraǵan.
Ekibastuzdyq Valentına Hamıtovanyń aıtýynsha, byltyrǵy qarasha aıynda ulynyń qyzýy kóterilip, úıine dáriger shaqyrady. Alaıda dáriger úıine kelmeı, em-domdy telefon arqyly jazyp bergen. Keıinirek klınıkaǵa barǵanda ózge dáriger nárestege angına dıagnozyn qoıyp, eresekterge arnalǵan antıbıotıkti probıotıksiz usynǵan. Retsepte emniń uzaqtyǵy men dozasy da kórsetilmegen.
— Keıin balamda demikpe paıda boldy. Jedel járdemdi shaqyrmaı, ulymdy aýrýhanaǵa alyp bardym. Ondaǵylar stomatıt dıagnozyn qoıyp, úıge qoıa berdi. Al keshke qaraı sábıimniń jaǵdaıy nasharlap bara jatqandyqtan jedel járdem shaqyrýǵa májbúr boldym. Pnevmonııaǵa shaldyqqan degen kúdikpen ony qalalyq aýrýhanaǵa jatqyzdy. Arada úsh saǵattan keıin medıtsına qyzmetkerleri ulymnyń qaıtys bolǵanyn habarlady, — deıdi anasy.
Medıtsınalyq saraptama bala ólimine sol jaqtaǵy ókpeniń qabynýy, irińdi bronhıt jáne panbronhıt sebep bolǵanyn kórsetken. Valentına Hamıtova Pavlodar oblysynyń densaýlyq saqtaý basqarmasyna aryz jazǵan. Aryz boıynsha kináli dárigerlerge aıyppul salynǵan.
Valentına Hamıtova medıtsına qyzmetkerleri jazasyn alýy kerek dep esepteıdi. Ol týraly kómek surap, Memleket basshysynyń atyna vıdeo úndeý jarııalady.
Ekibastuz qalasynyń polıtsııa basqarmasy QR Qylmystyq kodeksiniń 317-baby (Medıtsına qyzmetkeriniń kásibı mindetterin tıisinshe oryndamaýy) boıynsha sotqa deıingi tergeý bastalǵany týraly habarlady. Іstiń mán-jaıy jarııalanǵan joq.
Al Densaýlyq saqtaý basqarmasy oqıǵaǵa qatysty túsinik berýden bas tartty.
Eske sala keteıik, Almatyda jańa týǵan sábıin tastap ketken áıel ustalǵanyn jazdyq.