Ekibastuzda azamattardyń jappaı ýlanýyna qatysty sot úkimi shyqty
PAVLODAR. KAZINFORM - Sot meıramhana ıesine bir jyl bas bostandyǵyn shekteý jazasyn taǵaıyndady jáne qoǵamdyq tamaqtaný salasynda qyzmetpen aınalysýǵa tyıym saldy.
Ekibastuzda azamattardyń jappaı ýlanýyna baılanysty daýǵa núkte qoıyldy.
Atap aıtqanda, 2024 jyldyń 14-16 sáýir kúnderi aralyǵynda Astana, Qaraǵandy, Pavlodar jáne Ekibastuz qalalaryndaǵy medıtsınalyq mekemelerge tamaqtan ýlaný belgilerimen 56 azamat júgingen. Olardyń Ekibastuz qalasyndaǵy meıramhanada ótken toıǵa qatysqany málim bolǵan.
- Zardap shekken adamdardyń sanyna baılanysty tergeý bastalǵan sátten bastap qylmystyq is Ekibastuz prokýratýrasynyń baqylaýynda boldy. Protsessýaldyq prokýrorlar taǵaıyndaldy, saraptamalar uıymdastyryldy, tergeý tobynyń shyǵýy uıymdastyryldy. Ekibastuz qalalyq sotynyń úkimimen kináli tulǵaǵa qoǵamdyq tamaqtaný salasynda qyzmetpen aınalysýǵa tyıym salyndy. Sondaı-aq sot kináli azamattyń erkindigin bir jylǵa shektedi. Zardap shekkender sot sheshimine qanaǵattandy, tek meıramhana ıesi sot úkimin qaıta qaraý úshin shaǵymdandy,-dep habarlady óńirlik prokýratýradan.
Eske sala keteıik, 2024 jyldyń sáýir aıynda Ekibastuzda toıǵa jınalǵan qonaqtar tamaqtan jappaı ýlanyp qaldy.
Al qarasha aıynda tamaqtan ýlanyp qalǵan 16 adam Ekibastuzdaǵy «Grand Hall» meıramhanasynyń ıesinen jalpy somasy 6 mln teńge talap etip, sotqa ujymdyq talap aryz túsirdi.
Keıin sot sheshiminen tamaqtan ýlanǵandarǵa meıramhana ıesi 5 mln teńgeden astam ótemaqy tóleıtin boldy.