Ekibastuzda avtobýs júrgizýshisi egde áıeldi qaǵyp, oqıǵa ornynan ketip qalǵan

Ekibastuzda avtobýs qaqqan zeınetker áıel jansaqtaý bólimine tústi. Qoǵamdyq kólik júrgizýshisi aıaldamadan shyǵyp bara jatqan qart áıeldi baıqamaı qalǵan, dep habarlaıdy Kazinform tilshisi.

Oqıǵa 26 qazan kúndiz bolǵan.

Júrgizýshige qatysty Qylmystyq kodekstiń 345-baby 2-bóligi boıynsha sotqa deıingi tergeý amaldary bastaldy. Avtobýs aıyp turaǵyna qoıyldy.

«26 qazanda «Zhong Tong» markaly baǵdarly avtobýsty júrgizip kele jatqan er adam aıaldamada jolaýshylardy otyrǵyzý jáne túsirý kezinde jol erejesin saqtamaı, avtobýstyń aldynda turǵan áıeldi qaqty. Jol-kólik oqıǵasynan keıin ol oqıǵa ornynan ketip qalyp, qozǵalysty jalǵastyrdy», - dep habarlady Pavlodar oblysynyń polıtsııa departamentinen.

Polıtsııa oqıǵaǵa qatysty tergeý amaldaryn bastady. Saraptama taǵaıyndaldy, onyń qorytyndysy boıynsha protsessýaldy sheshim qabyldanady.

Densaýlyq saqtaý basqarmasy baspasóz qyzmetiniń málimetinshe, naýqas aýrýhananyń qabyldaý bólimine jabyq bassúıek-mı zaqymy, mıdyń jeńil soǵylýy, keýde qýysynyń jabyq jaraqatymen tústi.

Oǵan ókpeniń jáne kókirek organdarynyń kontýzııasy dıagnozy qoıyldy. Tabany myljalanǵan.

Jábirlenýshi jansaqtaý bóliminde aýyr halde jatyr. Kóp qan joǵaltty. Áıelge qan quıylyp, shuǵyl ota jasaldy.

«Sumdyq jaǵdaı boldy, anamdy avtobýs qaǵyp ketti. Ol ádettegideı beısenbi kúnderi gazet satyp alý úshin «Mechtaǵa» shyqqan edi... Anama ota jasaldy, jaǵdaıy óte aýyr: mıy shaıqalǵan, eki aıaǵynyń tabany myljalanǵan, ashyq synyq, ishki músheleri men kókiregine zaqym tıgen. Jaqyn jerde bolyp, oǵan kómekteskender, baılanysqa shyǵýlaryńyzdy suraımyn», - deıdi jábirlenýshiniń qyzy Svetlana Vaslıshına.

Áıel jol-kólik oqıǵasynyń kýágerlerin tabý úshin beıneúndeý túsirdi.

Belgili bolǵandaı, jedel járdemdi ótip bara jatqan adamdar shaqyrǵan. Qyzynyń aıtýynsha, 103 qyzmetine beıtanys bala habarlasqan.

Ol áleýmettik jeli arqyly balanyń anasyna alǵysyn aıtty.