Ekibastuzda alaıaqtyq áreketterge qatysqan eki jasóspirim ustaldy
PAVLODAR. KAZINFORM – Qos stýdent SIM-kartalary men WhatsApp akkaýnttaryn alaıaqtarǵa jalǵa berip kelgen. Keltirilgen jalpy shyǵyn 12 mıllıon teńgeden asqan.
Bıylǵy qyrkúıek aıynda oblys jáne Ekibastuz qalasy aýmaǵynda azamattardyń qarjysyn qashyqtan jymqyrýdyń eki deregi tirkelgen.
– Alaıaqtar WhatsApp qosymshasy arqyly turǵyndarǵa qońyraý shalyp, ózderin túrli memlekettik jáne qarjy uıymdarynyń qyzmetkerleri retinde tanystyrǵan. Jeke derekterdi qorǵaý men kıberqylmystyń aldyn alý syltaýymen azamattardy aldap, qoljetimdilik kodtary men bank derekterin ıemdengen. Keltirilgen jalpy shyǵyn 12 mıllıon teńgeden asty, - deıdi Pavlodar oblysy polıtsııa departamenti bastyǵynyń birinshi orynbasary Bolat Nurseıitov.
Bul qylmystyq shemaǵa óz SIM-kartalary men WhatsApp akkaýnttaryn jalǵa berip, qashyqtan tabyc tabýdy maqsat etken kolledj stýdentteri tartylǵan. Tólem krıptovalıýtamen júrgizilgen.
– Jedel is-sharalardyń nátıjesinde óz nómirlerin paıdalanýǵa bergen eki kámeletke tolmaǵan jasóspirim ustaldy. Olardyń qolynan 70-ten astam SIM-karta men mobıldi qurylǵylar tárkilendi. Shemada paıdalanylǵan 100-den astam abonenttik nómir anyqtaldy. Qazirgi ýaqytta asa iri kólemde jasalǵan alaıaqtyq deregi boıynsha sotqa deıingi tergeý bastaldy, - dep atap ótti departament ókili.
Eske sala keteıik, Pavlodarda prokýratýra qyzmetkerine qatysty alaıaqtyq faktisi boıynsha tergeý júrip jatyr