Ekibastuzda 40-qa jýyq maldy urlady degen kúdikpen tórt adam ustaldy

PAVLODAR. KAZINFORM — Ekibastuz óńirinde 40-qa jýyq usaq mal urlyǵyna qatysy bar degen kúdikpen tórt adam ustaldy. Bul týraly Pavlodar oblysy polıtsııa departamentiniń baspasóz qyzmeti habarlady.

y
Foto: Polisia.kz

Krımınaldyq polıtsııa qyzmetkerleriniń málimetinshe, kúdiktiler birneshe aı boıy óńir turǵyndarynyń malyn júıeli túrde urlap kelgen. Olar negizinen usaq maldy nysanaǵa alǵan. Jedel-izdestirý is-sharalary barysynda kúdiktilerdiń barlyǵy anyqtalǵan. Olardyń oblys turǵyndary ekeni belgili boldy.

— Jedel-izdestirý is-sharalarynyń kesheni barysynda barlyq kúdiktiniń jeke basy anyqtaldy. Tintý júrgizý kezinde tórt usaq mal jáne qylmys jasaýǵa paıdalanylǵan ózge de zattar tabylyp, tárkilendi, — deıdi Pavlodar oblysy polıtsııa departamenti Krımınaldyq polıtsııa basqarmasynyń bastyǵy Jasulan Tańjanov.

Qazir tórt kúdikti de qamaýǵa alynyp, ýaqytsha ustaý ızolıatoryna qamalǵan. Olarǵa qatysty tergeý amaldary jalǵasyp jatyr. Sonymen qatar polıtsııa qyzmetkerleri kúdiktilerdiń osyǵan uqsas ózge de qylmystarǵa qatysy bar-joǵyn tekserýde.

Vedomstvo ókilderi aýyl turǵyndary úshin mal negizgi tabys kózi ári uzaq jylǵy eńbektiń nátıjesi ekenin atap ótti. Osyǵan baılanysty polıtsııa árbir mal urlyǵy deregi boıynsha kinálilerdi anyqtap, olardy jaýapkershilikke tartý jáne urlanǵan múlikti ıelerine qaıtarý baǵytynda jumys júrgizip jatyr.

Buǵan deıin de Pavlodar oblysynda mal urlyǵyna kúdikti top ustalǵan jazǵanbyz.