Ekibastuzda 1 300 gektardan astam aýmaqta derekter ortalyǵy qurylady
ASTANA. KAZINFORM – Premer-mınıstr Oljas Bektenov Pavlodar oblysyna jumys sapary barysynda Ekibastuz energııa toraby bazasynda Prezıdenttiń «Derekterdi óńdeý ortalyǵy alqaby» jobasyn júzege asyrý jónindegi tapsyrmalarynyń oryndalýyn tekserdi. Bul týraly Úkimettiń baspasóz qyzmeti habarlady.
Ekibastuz MAES-1 aýdanynda bolashaqta 1300 gektardan astam aýmaqta ulǵaıtý múmkindigi bar aýdany 200 gektar jer ýchaskesi aıqyndaldy. Munda esepteý ınfraqurylymy, «bultty» servıster jáne JI múmkindikteri ornalastyrylatyn arnaıy aımaqty qurylmaq.
– Prezıdent tapsyrmasy boıynsha biz aýqymdy ınfraqurylymdyq joba – «Derekterdi óńdeý ortalyǵy alqabyn» júzege asyrýdy bastaımyz. Bul ekonomıkanyń joǵary tehnologııalyq sektorynyń damýyna eleýli serpin beredi. Barlyq memlekettik organ men jaýapty uıymdar nátıjege jetý úshin barynsha tıimdi jumys isteýi qajet, - dep atap ótti Oljas Bektenov.
Premer-mınıstrge «Derekterdi óńdeý ortalyǵy alqabynyń» dızaın-jobasy tanystyryldy. Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev, Pavlodar oblysynyń ákimi Asaıyn Baıhanov, «Qazaqtelekom» AQ tóraǵasy Baǵdat Mýsın júrgizilip jatqan jumystardyń barysy týraly baıandady.
«DÓO alqaby» ekojúıesi Ekibastuz energııa torabynyń energetıkalyq qýattary negizinde qurylatyn bolady. Tujyrymdamada nysandy qazirgi bar energetıkalyq ınfraqurylymdy paıdalana otyryp, qýattardy engizýdiń naqty belgilengen parametrleri boıynsha kezeń-kezeńimen damytý kózdelgen.
Joba sheńberinde uzyndyǵy 15 shaqyrym elektr taratý jelilerin sondaı-aq qýaty 300 MVt bolatyn jáne ony bolashaqta 1 GVt-qa deıin keńeıtý múmkindigi bar tómendetkish qosalqy stansalardyń ınfraqurylymyn salý qarastyrylǵan. Energetıka, esepteý qýatyn paıdalaný, JI jáne taǵy da basqa salalarda 500 joǵary bilikti jańa jumys oryndaryn qurý josparlanýda. Osyǵan baılanysty IT-mamandardy daıarlaýǵa basa nazar aýdarylady. Investorlar úshin Arnaıy ekonomıkalyq aımaqtar qaǵıdaty negizinde ınfraqurylym qurý, tarıf belgileý jáne salyqtyq preferentsııalar berý túrinde jaǵdaı jasaýǵa erekshe kóńil bólingen. Jobaǵa boljanyp otyrǵan ınvestıtsııa kólemi shamamen $30 mlrd-ty quraıdy. Búgingi tańda iri halyqaralyq kompanııalarmen kelissózder júrgizilýde.
Premer-mınıstr Qazaqstannyń tsıfrlyq ekonomıkasyn damytý konteksinde «DÓO alqabynyń» strategııalyq mańyzdylyǵyn atap ótti. Jasandy ıntellekt jáne tsıfrlyq damý, Energetıka mınıstrlikterine, Pavlodar oblysynyń ákimdigine «Qazaqtelekom» AQ-men birlesip jobany jedel júzege asyrý úshin barlyq qajetti jaǵdaılar men ınfraqurylymdy qamtamasyz etý tapsyryldy.
– Bul bolashaqtyń ındýstrııasy. Bizdiń básekelestik artyqshylyqtarymyzdy paıdalaný mańyzdy. Jobany júzege asyrýǵa barlyq alǵysharttar bar – elektr energııasy, klımat, transkaspıı kabeli. Sondyqtan qabyldaý qajet barlyq sheshimderdi engizip, artyq bıýrokratııasyz alǵa jyljý kerek. Men bul jobamen tikeleı ózim aınalysamyn. Biz múmkindiginshe qysqa merzimde osy kezeńnen tez ótip, kelisimsharttar jasap jáne álemdik kompanııalarǵa qýat berý arqyly jumysqa kirisýimiz kerek, - dep atap ótti Oljas Bektenov.
Eske salsaq, buǵan deıin Ekibazstuz MAES-2-de 2030 jylǵa qaraı eki jańa energııa blogy salynatynyn jazǵan edik.