Ekibastuz JEO «70/30» modeli aıasynda jańǵyrtylýy múmkin
ASTANA. KAZINFORM — Qazaqstan Respýblıkasynyń Jasandy ıntellekt jáne tsıfrlyq damý mınıstrligi Energetıka mınıstrligimen birlesip, eldiń energetıkalyq ınfraqurylymyn «70/30» modeli boıynsha jańǵyrtýǵa jáne keńeıtýge jeke ınvestıtsııalardy tartý mehanızmin engizbek. Bul týraly JI mınıstrligi málim etti.
Bul mehanızmdi iske asyrýdyń quqyqtyq negizi telekommýnıkatsııa naryǵyn jáne derekterdi óńdeý ortalyqtaryn damytý máseleleri jónindegi qabyldanǵan zańmen qalandy. Onda derekterdi óńdeý ortalyqtary strategııalyq obektilerge jatqyzyldy, bul derekterdi óńdeý ortalyqtarynyń operatorlary men tsıfrlyq maınerlerdi elektr energııasyn uzaq merzimdi tutynýshylar retinde tarta otyryp, generatsııalaý qýattaryn jańǵyrtýǵa jáne keńeıtýge jeke ınvestıtsııalardy tartýǵa jaǵdaı jasaıdy.
Memleket basshysy jarııalaǵan JI jylynda sapaly esepteý qýattaryna jáne turaqty energetıkalyq bazaǵa degen qajettilik basym mindetke aınalýda. Usynylyp otyrǵan tásil memlekettik bıýdjetke qosymsha júkteme túsirmeı jáne ınvestıtsııalyq shyǵyndardy halyqqa arnalǵan tarıfterge qospaı, jańa generatsııalaý qýattaryn jedeldetip iske qosýǵa baǵyttalǵan.
— Mehanızm boıynsha jumys istep turǵan elektr stantsııalaryn jańǵyrtý, qaıta jańartý nemese keńeıtý kezinde qosymsha qurylǵan elektr qýatynyń 70%-yn derekterdi óńdeý ortalyqtary men tsıfrlyq maınerlerdi qosa alǵanda, kólemdi elektr energııasyn tutynýshylarǵa tikeleı satýǵa bolady. Jańa qýattyń qalǵan 30%-y eldiń energetıkalyq qaýipsizdigin nyǵaıtý jáne elektr energııasyna ósip kele jatqan suranysty jabý úshin Qazaqstan Respýblıkasynyń Biryńǵaı elektr energetıkalyq júıesine baǵyttalatyn bolady, — delingen habarlamada.
Bul tásildi iske asyrý energetıkalyq ınfraqurylymdy damytýǵa jeke kapıtaldy tartýǵa, qoldanystaǵy generatsııalaý obektilerin jańǵyrtýdy qamtamasyz etýge, energııamen jabdyqtaý senimdiligin arttyrýǵa jáne ekonomıkanyń joǵary tehnologııalyq salalaryn damytýǵa qosymsha jaǵdaı jasaýǵa múmkindik beredi.
— «70/30» modeli — bul ınvestıtsııalyq sheshim jáne tsıfrlyq ekonomıkamyzdyń energetıkalyq táýelsizdiginiń irgetasy. JI-di tolyqqandy damytý jáne básekege qabiletti derekterdi óńdeý ortalyqtaryn salý úshin biz generatsııanyń ozyq damýyn qamtamasyz etýimiz kerek. Bul mehanızm azamattarǵa arnalǵan tarıfterge júkteme túsirmeı, ınfraqurylymdy jańǵyrtýǵa jeke kapıtaldy tartýǵa múmkindik beredi jáne «Digital Qazaqstan» strategııasynyń maqsattaryn júzege asyrýǵa serpin bermek, — dep atap ótti Jasandy ıntellekt jáne tsıfrlyq damý vıtse-mınıstri Ǵızzat Baıtursynov.
Atalmysh mehanızm halyqaralyq ınvestorlar tarapynan qyzyǵýshylyq týdyrdy. Qazirgi tańda Ekibastuz jylý elektr ortalyǵyn «70/30» modeli aıasynda jańǵyrtý jáne keńeıtý jobasyn júzege asyrýdy qarastyryp jatqan múddeli ınvestor da bar.
Joba generatsııalaý qýattaryn kezeń-kezeńimen arttyrýdy, jańa energetıkalyq ınfraqurylym salýdy, sondaı-aq qalany jylýmen jabdyqtaý senimdiligin arttyrýǵa baǵyttalǵan is-sharalardy júzege asyrýdy kózdeıdi.
Tehnıkalyq tekserý nátıjeleri boıynsha jobany stantsııanyń qolda bar áleýetin paıdalana otyryp, turaqty jylýmen jabdyqtaýǵa nuqsan keltirmesten júzege asyrý múmkindigi rastaldy. Qazirgi ýaqytta múddeli taraptarmen birlesip uıymdastyrýshylyq, tehnıkalyq jáne ınvestıtsııalyq máselelerdi pysyqtaý jalǵasady.
«70/30» modelin engizý eldiń energetıkalyq ınfraqurylymyn damytýdaǵy mańyzdy qadam bolmaq. Ol salaǵa qosymsha ınvestıtsııalar tartýǵa, jańa generatsııalaý qýattaryn qurýǵa jáne tsıfrlyq ekonomıka men Qazaqstan Respýblıkasynyń energetıkalyq júıesiniń qajettilikteri arasyndaǵy tepe-teńdikti qamtamasyz etýge múmkindik beredi.
Aıta keteıik, Qazaqstan 2027 jyldan bastap elektr energııasy profıtsıtin qalyptastyrýdy josparlap otyr.
