Ekibastuz turǵyny qalany ekinshi ret «jarmaq» boldy
Terrorızm aktisi týraly kórineý jalǵan habarlaǵany úshin buǵan deıin de jaýapqa tartylǵan er adam óz qateliginen sabaq almaı, bomba týraly aıtyp, qaıta qońyraý shalǵan, dep habarlaıdy QazAqparat.
Polisia.kz málimetinshe, ol birinshi qylmysyn 2019 jyldyń mamyr aıynda jasaǵan. Sol kezde oǵan 2 jyl 6 aı merzimge bas bostandyǵyn shekteý jazasy taǵaıyndaldy. Biraq qala turǵyny probatsııa qyzmetiniń esebinde turyp, jazany óteý tártibi men sharttaryn buzǵan. Sol sebepti bas bostandyǵyn shekteý jazasy bas bostandyǵynan aıyrýǵa aýystyryldy. 1 jyl 26 kúndi, ıaǵnı óziniń ótelmegen merzimin Ekibastuz turǵyny qylmystyq-atqarý júıesi mekemesinde ótkizdi.
Alaıda, bostandyqqa shyqqannan keıin er adam osyndaı qylmysqa qaıta barǵan. Ol ótken jyldyń jeltoqsan aıynda polıtsııaǵa qońyraý shalyp, “ákimdik ǵımaratynda bomba bar” dep habarlady.
«Mamandar ǵımarattan jarylǵysh zat tappady. Qajetti is-sharalar keshenin ótkizý nátıjesinde jalǵan terrorıst ustaldy. Er adam óz áreketin moıyndap, týystarymen janjaldasyp qalǵannan keıin osyndaı qadamǵa barǵanyn aıtty», – dep atap ótti Pavlodar oblysynyń Polıtsııa departamentinen.
«Telefon» terrorısine qatysty is Ekibastuz qalasynyń sotynda qaralyp, ol 3 jylǵa bas bostandyǵynan aıyryldy. Sonymen qatar memlekettik organdarǵa 200 myń teńgeden astam somadaǵy materıaldyq zalaldy jáne sot shyǵyndaryn óteýge tıis.
Polıtseıler eske salyp ótkendeı, Qylmystyq kodekstiń 273-babynda terrorızm aktisi týraly kórineý jalǵan habar bergeni úshin 5000 AEK-ke (17 250 000 teńge) deıingi mólsherde aıyppul túrinde, ne sol mólsherde túzeý jumystary, ne 5 jylǵa deıingi merzimge bas bostandyǵynan aıyrý/shekteý jazalary kózdelgen.
