Ekibastuz turǵyny aıaǵyna salynǵan ınektsııadan keıin qaıtys boldy

PAVLODAR. KAZINFORM – 40 jastaǵy Ekibastuz turǵyny qyrkúıek aıynda jeke klınıkanyń kómegine júgingen. Arada bir apta ótkende er adam aıaq astynan dúnıeden ozdy.

Marqumnyń týystarynyń aıtýynsha, 8 qyrkúıek kúni Jeńis Bekjigitov Ekibastuzdaǵy jeke klınıkalardyń birine baryp, aıaǵynyń aýyratyn aıtyp shaǵymdanǵan. Medıtsınalyq tekserýden soń naýqasqa «oń jaq tize býynynyń osteoartrıti» degen dıagnoz qoıylyp, 10 qyrkúıek kúni býyn ishine ekpe salady. Alaıda kelesi kúni er adamnyń aıaǵy isip, qatty aýyra bastaǵan. 

– Dáriger telefon arqyly aspırın men dıklofenak qabyldaýy kerek ekenin, keıin qabyldaýǵa kelýdi qaperge salǵan. 12 qyrkúıek kúni onyń jaǵdaıy aıaq astynan kúrt nasharlap, qyzýy kóterilip, denesin álsizdik jaılap, esin joǵalta bastaǵan. Artynsha qan qysymy 90/60-qa deıin tómendep ketti. Jedel járdem brıgadasy ony aýrýhanaǵa alyp ketýden bas tartyp, aqyly túrde jetkizetin ózge adamdarǵa habarlasýdy usyndy. Aqyry týystary Jeńisti Ekibastuz qalalyq aýrýhanasyna óz kúshterimen jetkizdi. Ol jerde shuǵyl hırýrgııalyq ota jasaldy, - dep jazdy áleýmettik jelide marqumnyń týystary.

Dárigerler kelesi kúni aýrýhanada ókpeni jasandy tynys aldyratyn apparat joq dep, Jeńisti jansaqtaý bólimine aýystyrady. Ókinishke qaraı, arada bir kún ótkende er adam qaıtys bolǵan.

– Biz, marqumnyń týystary medıtsınalyq kómekti durys kórsetpeýdiń saldary, ıaǵnı ekpeni eshbir reaktsııalyq baqylaýsyz taǵaıyndaý jáne jedel járdemniń áreketsizdigi onyń ómirin qıdy dep esepteımiz, - deıdi Jeńis Bekjigitovtiń týystary. 

Marqumnyń jaqyndary QR Densaýlyq saqtaý mınıstrligine, sondaı-aq Bas prokýratýraǵa shaǵymdanǵan. Máselege qoǵam ókilderiniń aralasýyn da surap otyr.

Al óńirlik polıtsııa departamenti medıtsına qyzmetkeriniń kásibı mindetterin tıisinshe oryndamaý deregi boıynsha qylmystyq is qozǵalǵanyn habarlady. 

– Oqıǵanyń mán-jaıy men sebepteri tergeý barysynda anyqtalady. QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń Pavlodar oblysy boıynsha departamenti medıtsına qyzmetkerlerine jospardan tys tekserý júrgizedi. Onyń nátıjeleri boıynsha komıssııalyq sot-medıtsınalyq saraptama taǵaıyndalady, - dep málimdedi polıtsııadan. 

Eske sala keteıik, Ekibastuzda jumysshy tok soǵyp, mert boldy.