Ekibastuz turǵyndary sanıtarlyq talapty eskermegen meıramhanaǵa shaǵymdandy

PAVLODAR. KAZINFORM - Qalanyń sanıtarııalyq-epıdemıologııalyq baqylaý basqarmasy jaqyn mańdaǵy úı turǵyndarynyń ujymdyq aryzy negizinde tekserý júrgizgen.

Turǵyndar shaǵymdaryna sanıtarııalyq normalardyń buzylǵanyn dáleldeıtin materıaldardy da qosa usynǵan.

– Tekserý nátıjesinde meıramhana aýmaǵynda qaldyqtardy jınaýǵa arnalǵan qaqpaǵy joq eki metall bóshkeniń bary, jabyq konteınerlerdiń bolmaýy, dezınsektsııa jáne deratızatsııa jumystarynyń júrgizilgenin rastaıtyn qujattardyń joqtyǵy, sondaı-aq qatty turmystyq jáne tamaq qaldyqtaryn shyǵarýǵa qatysty kelisimsharttardyń usynylmaǵany anyqtaldy. Osyǵan baılanysty Canıtarııalyq-epıdemıologııalyq baqylaý basqarmasy kásipkerge buzýshylyqtardy joıý týraly nusqama bergen. Alaıda meıramhana ıesi bul sheshimmen kelispeı, nusqamany zańsyz dep taný týraly sotqa júgindi, – dep habarlady №2 oblystyq mamandandyrylǵan aýdanaralyq ákimshilik sotynyń baspasóz qyzmetinen.

Sot otyrysynda jospardan tys tekserýdiń Kásipkerlik kodekste kózdelgen negizderge saı júrgizilgeni anyqtaldy. Sondaı-aq tekserý barysynda QR Densaýlyq saqtaý mınıstriniń 2022 jylǵy buıryǵymen bekitilgen «Qoǵamdyq tamaqtandyrý obektilerine qoıylatyn sanıtarııalyq-epıdemıologııalyq talaptardyń» buzylǵany rastaldy.

Meıramhana ıesiniń tekserý akti men nusqamada mekenjaıdyń durys kórsetilmegeni týraly ýáji sotta negizsiz dep tanyldy.

Eske sala keteıik, 2024 jyldyń sáýir aıynda Ekibastuzda toıǵa jınalǵan qonaqtar tamaqtan jappaı ýlanyp qaldy. 

Keıin toıda ýlanǵandar meıramhana ıesinen 6 mln teńge ótemaqy talap etti. 

Sot sheshiminen tamaqtan ýlanǵandarǵa meıramhana ıesi 5 mln teńgeden astam ótemaqy tóleıtin boldy. 

Al sáýir aıynyń sońynda azamattardyń jappaı ýlanýyna qatysty sot úkimi shyqty.