Ekibastuz turǵyndary kenishtegi kómirdiń únemi janyp jatatyndyǵyna shaǵymdandy
PAVLODAR. KAZINFORM - Adamdar kenishtegi ýly tútindi jutyp jumys isteýge májbúr bolyp júrgenderin jetkizgen. Al kásiporyn qosymsha zııan úshin mardymsyz tólemaqy berip otyrǵan kórinedi.
Áleýmettik jelide Ekibastuzdaǵy «Shyǵys» kenishinde kómirdiń ashyq aspan astynda únemi byqsyp janyp jatatyndyǵy týraly beınejazba tarap ketti.
— Ekologtar ázirge Ekibastuz qalasynda tútinniń paıda bolý sebebin túsindire almaı otyrǵanda, «Shyǵys» kenishinde kómirdiń janýy jalǵasyp jatyr. Kómir aılap janyp jatyr. Ýly, qoıý tútin aınalany basyp ketedi. Adamdar bul jaǵdaıda kúndelikti jumys isteıdi, biraq qosymsha zııan úshin olarǵa kásiporyn az tóleıdi. Tútin, janý, shań — munyń bári kúndelikti «normaǵa» aınaldy, degenmen bul densaýlyqqa tikeleı áser etedi. Respıratorlar qutqarmaıdy jáne ýaqyt óte kele ýly tútinniń saldary asa aýyr bolýy múmkin, — dep jazdy shaǵymdanýshylar jelide.
Turǵyndar onyń ústine Ekibastuz qalasyn ótken jazdan beri tútin basyp turǵanyna shaǵymdanǵan. Aıtýlarynsha, halyq qandaı aýamen tynystap otyrǵandaryn bilmeıdi. Biraq olar jaǵymsyz ıisti jaqsy sezedi.
— Shyndyqty eshkim aıtqysy kelmeıdi. Ekologııalyq qyzmet bolyp jatqan oqıǵalardy elegisi kelmeıtin túr baıqatyp otyr. Tekserýler ótkizilip jatqan sııaqty, biraq olar bul jaǵdaıdy kórmeıdi nemese kórgisi kelmeıtindeı, — degen shaǵymdaryn jetkizdi kópshilik.
Oblystyq ekologııa departamenti basshysynyń orynbasary Áset Syzdyqov atalǵan jaıtty mekeme mamandary nazarǵa alǵanyn habarlady.
— Atalǵan shaǵym departamentte tirkeldi. Qazirgi ýaqytta «Shyǵys» kenishine jospardan tys tekserý júrgizý týraly sheshim shyǵyp, ol prokýratýrada tirkeýden ótýde. Odan soń birden tekserý is-sharalaryna kirisemiz. Ol shamamen 10 kúndeı ýaqytty alýy yqtımal, — dedi departament ókili.
Onyń sózinshe, kómir kenishterindegi tútin men shań-tozańnyń qalaǵa jetýi neǵaıbyl. Sebebi kenishter tómen ornalasqan. Ekibastuzǵa jel baǵyty ózgergen ýaqytta GRES-terdiń tútini jetýi múmkin. Biraq byltyr turǵyndardyń shaǵymynan soń ekologııa departamenti men «Qazgıdromet» RMK fılıalynyń mamandary qalada aýa monıtorıngin júrgizip, shekti ruqsat etilgen kontsentratsııa mólsheriniń artýyn anyqtamaǵan. Endigi mezette mundaı monıtorıng taǵy júrgiziledi.
Al «Shyǵys» kenishine ıelik etetin «EEK» AQ bıylǵy qys Ekibastuz óńirinde anomaldi sıpatqa ıe ekenin, kenishte ótken jyldyń qarasha-jeltoqsan aılarynda ózdiginen qyzyp janǵan kómir oshaqtarynyń aldyn alý boıynsha jumystar júrgizilgenin málimdedi.
— Joıý jumystaryna qatysqan qyzmetkerlerge zııandy eńbek jaǵdaıy úshin tólemder jasalyp, arnaıy tamaqtaný usynyldy. Taý-ken óndirisi tehnologııasynda burǵylaý-jarý jumystary júrgiziletini málim, onyń barysynda aıtarlyqtaı shań men tútin bólinedi. Joǵary qysym kezinde jáne jelsiz aýa raıynda ýaqytsha qolaısyzdyqtar qalyptasady, — dep habarlady kásiporynnan.
Eske sala keteıik, Pavlodar óńirinde ekologııalyq zańnama talaptaryn buzýdyń 77 deregi anyqtalǵan.