Ekibastuz mańynan Qyzyl kitapqa engen jaraly qyran qutqaryldy

PAVLODAR. KAZINFORM — Pavlodar oblysynda ormanshylar Qyzyl kitapqa engen jaraly qusty qutqaryp qaldy. Dala qyrany Ekibastuz qalasynan 20 shaqyrym jerden tabylǵan.

Ekibastuz mańynan Qyzyl kitapqa engen jaraly qyran qutqaryldy
Foto: Vıdeodan skrın

Oqıǵa týraly ormanshylarǵa Ekibastuz qalasynyń turǵyny habarlaǵan. Onyń aıtýynsha, Maıqaıyń kentine qaraı baǵyttaǵy dalalyq jerde jaralanǵan qus jatqan.

— Habarlama túsken soń Pavlodar ormanshylyǵynyń qyzmetkerleri oqıǵa ornyna jedel jetken. Olar jaraly qustyń Qazaqstannyń Qyzyl kitabyna engizilgen dala qyrany ekenin anyqtady. Qustyń qanatyna zaqym kelgen, — deıdi Pavlodar orman jáne janýarlar dúnıesin qorǵaý mekemesiniń basshysy Ajdar Júsipov.

Qusty qaýipsiz jerge jetkizgen ormanshylar ony veterınarlyq dárigerlerge kórsetken. Mamandardyń tekserýinen keıin búrkit tuqymdas dala qyrany Pavlodar aýylyndaǵy arnaıy orynǵa ýaqytsha ornalastyrylady.

Buǵan deıin Pavlodarda turǵyndar eliktiń laǵyn qutqaryp qalǵanyn jazǵanbyz. Sharbaqty tasjolynyń boıynda, Galkın aýylynan oblys ortalyǵyna qaraı kele jatqan otbasy eliktiń kishkentaı tólin baıqap qalǵan. Olar jabaıy janýardy ózderimen birge ala ketip, ormanshylardyń qolyna tapsyrǵan.

Al onyń aldynda balyqshylar muz kóshkininde qalyp qoıǵan ıtti qutqaryp qaldy.