Ekibastuz MAES-3 jylyna shamamen 20 mlrd kVt·saǵ elektr energııasyn óndirmek
ASTANA. KAZINFORM — Kómir generatsııasyn damytý jónindegi ulttyq jobany iske asyrýda Pavlodar oblysy strategııalyq ról atqarady. Ótken jyldyń qorytyndysy boıynsha aımaq elimizdegi barlyq elektr energııasy óndirisiniń 42%-yn qamtamasyz etti, dep habarlaıdy Energetıka mınıstrliginiń baspasóz qyzmeti.
Energetıkalyq qaýipsizdikti nyǵaıtýdyń sheshimdi kezeńi — Ekibastuz GRES-2 stantsııasyn keńeıtý bolmaq. Bul nysannyń belgilengen qýatyn 1 GVt-tan 2,1 GVt-qa deıin arttyrýǵa múmkindik beredi.
Sonymen qatar, «taza kómir» zamanaýı tehnologııalaryn qoldana otyryp, qýaty 2,64 GVt bolatyn jańa Ekibastuz GRES-3 stantsııasyn salý jáne Aqsý GRES-in jańǵyrtý josparlanǵan.
— Generatsııanyń mundaı aýqymdy damýy shıkizat bazasyn ozyq qarqynmen keńeıtýdi talap etedi. Bul baǵytta Qazaqstandaǵy búkil kómir óndirisiniń 38%-yn qamtamasyz etip otyrǵan «Bogatyr Kómir» JShS basty orynǵa ıe. Teńgerimdik qory 2,4 mlrd tonnany quraıtyn kásiporyn óndiristik kórsetkishterdi kezeń-kezeńimen arttyrýdy kózdep otyr: óndiris kólemi 2024 jylǵy 42,7 mln tonnadan 2026 jylǵa qaraı 45,2 mln tonnaǵa deıin ósip, 2032 jylǵa qaraı jyl saıynǵy 56,5 mln tonnalyq uzaq merzimdi mejege shyǵady dep josparlanǵan. Osy maqsattarǵa qol jetkizý úshin 2026–2032 jyldar aralyǵynda kólemi 360 mlrd teńgeni quraıtyn aýqymdy ınvestıtsııalyq baǵdarlama qarastyrylǵan. Qarajat kúrdeli qurylysqa, sonyń ishinde «Severnyı» qımasynda joǵary tıimdi tsıkldik-aǵyndyq tehnologııany engizýge jáne jańa úıindilerdi jabdyqtaýǵa baǵyttalady, — delingen habarlamada.
Sondaı-aq, qarajattyń edáýir bóligi taý-ken kólik jabdyqtary parkin júıeli túrde jańartýǵa, sondaı-aq qoldanystaǵy qýattardy rekonstrýktsııalaý men kúrdeli jóndeýge jumsalady. Bul elimizdiń energetıka sektorynyń ósip kele jatqan qajettilikterin óteý úshin kómir jetkizý turaqtylyǵyna kepildik beredi.
Osyǵan deıin 2030 jylǵa qaraı Ekibastuz GRES-2 stansasynda jańadan eki energııa blogy salynatynyn jazǵanbyz.