Ekibastuz MAES-1 stansasynda №1 energoblok iske qosyldy

PAVLODAR. KAZINFORM - Bolat Nurjanov atyndaǵy Ekibastuz №1 memlekettik aımaqtyq elektr stansasynda birinshi energııalyq blokty qalpyna keltirý jobasy óz máresine jetti. Nátıjesinde kásiporyn sońǵy 30 jylda alǵash ret segiz blokty rejımde tolyq qýatyna kóshti.

Ekibastuz MAES-1 stansasynyń №1 energoblogy tolyq qýatta 72 saǵat boıy sátti jumys istep, paıdalanýǵa engizildi. 

- 500 MVt qýatqa ıe jańa energoblok elimizdiń energetıkalyq qýattaryn aıtarlyqtaı arttyryp, ekonomıka men halyqty turaqty jáne senimdi elektrmen jabdyqtaýdy qamtamasyz etedi. Energoblokty salý jobasy memleket basshysy Qasym-Jomart Toqaevtyń otandyq energetıkalyq ınfraqurylymdy damytý jáne jańǵyrtý jónindegi tapsyrmasyn júzege asyrýdaǵy mańyzdy kezeń boldy. Ekibastuz MAES-1, eldiń jetekshi energetıkalyq ortalyqtarynyń birinde ornalasqan. Qazaqstannyń energetıkalyq qaýipsizdigin qamtamasyz etýde jáne ındýstrıaldyq damýyn qoldaýda strategııalyq rólin atqarýdy jalǵastyrýda, - dep habarlady QR Energetıka mınısttrliginen.

Energııa blogyn engizý arqyly stansa 4000 MVt-tyq qýattylyqqa shyǵady. Bul sońǵy 30 jylda bolmaǵan segiz blokty rejımde jumys isteýge múmkindik beredi.

Eske sala keteıik, bıylǵy qarasha aıynyń ortasynda Ekibastuz №1 MAES stansasynda bir energııa blogy kenetten jumysyn toqtatqan edi.

Al 2022 jyldyń 27 qarashasynda Ekibastuz JEO-synda apat bolyp, qala turǵyndary qatty aıazda jylýsyz qalǵan bolatyn.