Ekibastuz kenishterinde kómir janyp jatyr: kásiporyndarǵa aıyppul salyndy

PAVLODAR. KAZINFORM — Pavlodar oblysynyń ekologııa departamenti óńirdegi tórt kómir kenishinde kómirdiń únemi qyzyp, janý derekterin rastady. Kompanııalarǵa jalpy somasy 3 mln teńgege jýyq aıyppuldar salyndy. 

Óńirlik ekologııa departamentiniń mamandary turǵyndardyń shaǵymy boıynsha birneshe kenishti tekserip, ekologııalyq talaptardyń buzylýyn anyqtaǵan.

— Ekibastuzdaǵy «Bogatyr», «Shyǵys», «Angrensor Energo» jáne Baıanaýyl aýdanyndaǵy «Maıkóbe» kómir kenishterine ekologııalyq tekserý júrgizildi. Tekserý barysynda kómir kenishterindegi kómirquramdy jynystardyń ózdiginen qyzý oshaqtary anyqtaldy. Mundaı jaıttardyń aldyn alý sharalarynyń oryndalmaýy atmosferalyq aýaǵa lastaýshy zattardyń bólinýine ákep soqqan. Bul — tabıǵatty paıdalaný salasyndaǵy ekologııalyq talaptardyń buzylýy. Buǵan qosa qorshaǵan ortaǵa emıssııalarǵa berilgen ruqsat sharttary tolyq kólemde oryndalmaǵan, — deıdi ekologııa departamenti basshysynyń orynbasary Áset Syzdyqov.

Tekserý qorytyndysy boıynsha kenish ıeleri ákimshilik jaýapkershilikke tartylyp, «Bogatyr Kómir» JShS-ne — 680 myń, «EEK» AQ-ǵa («Shyǵys» kenishi) — 889 myń, «Angrensor Energo» JShS-ne — 702 myń, «Maıkóben-Vest» AQ-ǵa 658 myń teńge aıyppul salynǵan.

— Kásiporyndarǵa kómirquramdy jynystardyń ózdiginen qyzý oshaqtaryn oqshaýlaý jáne joıý boıynsha tehnıkalyq is-sharalar josparyn belgilengen merzimde ázirlep, iske asyrý týraly nusqama berildi. Nusqamanyń oryndalýy ekologııa departamentiniń baqylaýynda tur, — dep qosty departament ókili.

Buǵan deıin Ekibastuz turǵyndary kenishtegi kómirdiń únemi janyp jatatyndyǵyna shaǵymdanǵan bolatyn. Adamdar kenishtegi ýly tútindi jutyp jumys isteýge májbúr. Al kásiporyn qosymsha zııan úshin mardymsyz tólemaqy berip otyr.