Ekibastuz qalasyn basqan qoıý tútin jurtty shoshytty
PAVLODAR. KAZINFORM - Ekibastuz turǵyndary áleýmettik jelilerde qaladaǵy qoıý tútin men jaǵymsyz ıiske shaǵymdandy.
Áleýmettik jelide Ekibastuz kóshelerinen túsirilgen beınejazba jarııalanǵan.
Pikir qaldyrǵan turǵyndar tútin saldarynan tynys alýdyń qıyndaǵanyn atap ótken.
Keıin áleýmettik jelilerde kómir kenishinen túsirilgen beınejazba da paıda boldy. Onda da tútinniń taralǵany anyq baıqalady.
Jarııalanymdardan keıin Pavlodar oblysynyń ekologııa departamenti tekserý jumystaryn uıymdastyrǵan. Mamandar Ekibastuz qalasynyń qoǵam ókilderimen, jer qoınaýyn paıdalaný, qorshaǵan orta jáne sý resýrstary basqarmasy, sanıtarııalyq-epıdemıologııalyq baqylaý qyzmetiniń jáne «Qazgıdromet» RMK qyzmetkerlerimen birlesip, atmosferalyq aýanyń sapasyna ólsheý júrgizgen.
- Ekibastuz qalasynyń turǵyn úıler ornalasqan aýmaǵynda jáne iri ónerkásiptik kásiporyndardyń sanıtarlyq-qorǵaý aımaqtarynda atmosferalyq aýanyń sapasyna zertteý júrgizildi. Zertteý nátıjeleri boıynsha atmosferalyq aýa quramyndaǵy lastaýshy zattardyń shekti jol beriletin kontsentratsııalarynan asyp ketý derekterianyqtalǵan joq, — dep habarlady Pavlodar oblysynyń ekologııa departamentinen.
Buǵan qosa departament «Angrensor Energo» JShS kómir kenishiniń mańaıyndaǵy úıindilerde tútindeý áli de jalǵasyp jatqanyn habarlady. Vedomstvonyń málimetinshe, jospardan tys tekserý barysynda endogendik órt oshaqtary anyqtalǵan.
Budan bólek, 27 tamyzda «Ekibastuz GRES-1» JShS-de júrgizilgen tekserý aıaqtalǵan.
Atmosferalyq aýanyń sapasyn zertteý barysynda kómirtek totyǵy boıynsha ruqsat etilgen shyǵaryndylar normatıvteriniń asyp ketkeni anyqtalǵan.
Qazirgi ýaqytta mamandar Ekibastuz qalasynyń qoǵam ókilderimen birlesip, qaladaǵy tútinniń paıda bolý sebepterin anyqtaý boıynsha jumystar júrgizip jatyr.
Ekibastuz turǵyndary kenishtegi kómirdiń únemi janyp jatatyndyǵyna buǵan deıin de shaǵymdanǵan bolatyn. https://kaz.inform.kz/news/ekbastuz-turgindari-kenshteg-komrdn-unem-zhanip-zhatatindigina-shagimdandi-9b105b/
Bıylǵy qańtar aıynda ekologııa departamenti óńirdegi tórt kómir kenishinde kómirdiń únemi qyzyp, janý derekterin rastaǵan. Kompanııalarǵa jalpy somasy 3 mln teńgege jýyq aıyppuldar salyndy.
