Ekibastuzda Tótenshe jaǵdaılar basqarmasynyń bastyǵy sottaldy

PAVLODAR. KAZINFORM – Osy jyldyń 31 naýryzynda Pavlodar oblysynda Ekibastuz qalalyq soty Ekibastuz qalasy Tótenshe jaǵdaılar basqarmasynyń bastyǵy D.Kýkonevke, onyń orynbasary J.Maımanovqa jáne kásipker B.Jumashevke qatysty úkim shyǵardy. Bul týraly Sybaılas jemqorlyqqa qarsy is-qımyl agenttigi habarlady.

– Kýkonev pen Maımanov Jumashevten óziniń kásipornymen memlekettik emes órtke qarsy qyzmet kórsetý sharttaryn jasasqany úshin jalpy somasy 7,4 mln teńgeni birneshe ret para alǵany úshin kináli dep tanyldy, - delingen habarlamada.

Sot úkimimen Kýkonev 7 jyl 6 aıǵa, Maımanov pen Jumashev árqaısysy 7 jylǵa bas bostandyǵynan aıyryldy. Sondaı-aq, olar ómir boıy memlekettik qyzmette jáne kvazımemlekettik sektorda qyzmet atqarý quqyǵynan aıyryldy.

Sonymen qatar Kýkonev «azamattyq qorǵanys polkovnıgi», Maımanov «azamattyq qorǵanys maıory» arnaıy ataǵynan aıyryldy.

Sot aktisi zańdy kúshine engen joq.

Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi.

Buǵan deıin Túrkistan oblysynda bilim salasynyń qyzmetkerleri 547 mıllıon teńgeden astam qarjy jymqyrdy degen aıyppen sottalǵanyn jazǵan bolatynbyz.