Ekibastuz GRES-2-de jańa energobloktardyń qurylysy kesteden keshigip jatqany ras pa
ASTANA. KAZINFORM — Úkimet otyrysynan keıingi brıfıngide «Samuryq - Energo» AQ Basqarma tóraǵasy Ańsar Aıdarov Ekibastuz GRES-2-de jańa energobloktardy salý barysy jóninde málimdedi.
– Keshe ǵana merdigerdiń qatysýymen jınalys ótkizdim. Jumystar kestege saı júrip jatyr. Qurylys alańynda qajettilikke saı 450 adam jumys istep jatyr. Qazandyq, týrbına tárizdi qurylǵylardy jetkizýde de eshqandaı bógelý joq, – dedi ol.
Sonymen qatar, Ańsar Aıdarov 2028 jyldyń qazan aıynda úshinshi energoblok, al 2030 jyly tórtinshi energoblok paıdalanýǵa beriletinin atap ótti.
– Tórtinshi energo-blokqa qajetti qurylǵylardy alý boıynsha kelisimshart jasaldy. 2027 jyldan bastap olar qurylys alańyna jetkiziledi, – dedi ol.
Aıta keteıik, buǵan deıin qala ákimi Aıan Beısekın Ekibastuzdaǵy GRES-2-niń úshinshi jáne tórtinshi energobloktaryn salý jumystary bekitilgen qurylys-montaj jumystarynyń kestesinen qalyp qoıǵanyn málimdegen edi.
Alaıda búgin «Samuryq - Energo» AQ Basqarma tóraǵasy Ańsar Aıdarov bul aqparatty joqqa shyǵaryp otyr.
