Ekibastuz GRES-1-de jasandy ıntellektke negizdelgen baqylaý júıesi iske qosyldy
ASTANA. KAZINFORM — Intellektýaldy júıe óndiristik nysandardy naqty ýaqyt rejıminde baqylap, túrli buzýshylyqtardy avtomatty túrde tirkeıdi.
2026 jyldy Memleket basshysy Tsıfrlandyrý jáne jasandy ıntellekt jyly dep jarııalaý aıasynda Qazaqstan Respýblıkasy Energetıka mınıstrligi energetıka salasyn tsıfrlyq transformatsııalaý boıynsha júıeli jumystar júrgizýde. Salalyq kompanııalarmen birlesip zamanaýı tsıfrlyq tehnologııalar engizilip, óndiristik protsester avtomattandyrylyp, ıntellektýaldy basqarý júıeleri damytylýda.
B.Nurjanov atyndaǵy Ekibastuz GRES-1 stantsııasynda jasandy ıntellekt tehnologııalaryn qoldanatyn 200-den astam beınebaqylaý kamerasy ornatyldy. Júıe óndiristik qaýipsizdik deńgeıin arttyrýǵa jáne tótenshe jaǵdaılarǵa jedel den qoıýǵa baǵyttalǵan.
Intellektýaldy júıe óndiristik nysandardy naqty ýaqyt rejıminde baqylap, túrli buzýshylyqtardy avtomatty túrde tirkeıdi. Arnaıy jasandy ıntellekt platformasy tulǵany taný, jyldamdyq rejımin baqylaý, oqıǵalar jýrnalyn júrgizý, taldamalyq esepter men grafıkter qalyptastyrý múmkindikterin qamtıdy. Keshen quramyna buzýshylyqtar men shtattan tys jaǵdaılar týraly qyzmetkerlerdi jedel habardar etýge múmkindik beretin zamanaýı baılanys jáne qulaqtandyrý júıesi de engizilgen. Qolmen basqarý rejıminen bólek, júıe belgili bir oqıǵalardy anyqtaǵan kezde eskertý habarlamalaryn avtomatty túrde iske qosatyn stsenarııler de qarastyrylǵan.
Jaýapty qyzmetkerlerdiń jedel ózara is-qımyly úshin korporatıvtik Telegram-arna quryldy. Qandaı da bir buzýshylyq anyqtalǵan jaǵdaıda júıe oqıǵanyń sıpaty, anyqtalǵan orny, kamera nómiri, tirkelgen kúni men ýaqyty kórsetilgen habarlamany avtomatty túrde jiberedi. Júıege dıspetcherlik qyzmettiń aýysym bastyqtaryn qosa alǵanda, basshylar men jaýapty qyzmetkerler qosylǵan.
Júıeniń jumysy táýlik boıy baqylanady. Beıneaǵyndardy baqylaý jáne taldaý úshin beıneqabyrǵalarmen jabdyqtalǵan operatorlyq beketter uıymdastyrylǵan. Beınejazbalar serverlik jabdyqta saqtalady, bul qajet bolǵan jaǵdaıda oqıǵalardy jan-jaqty taldaýǵa múmkindik beredi.
Qosymsha baqylaý deńgeıin beınejazba júrgizý jáne onlaın-translıatsııa fýnktsııalarymen jabdyqtalǵan aqyldy kaskalar qamtamasyz etedi. Bul qurylǵylar birinshi tulǵa atynan beınejazbany naqty ýaqyt rejıminde jetkizedi, al jasandy ıntellekt tehnologııalary jumys barysynda oryn alyp jatqan jaǵdaılardy birden taldaýǵa múmkindik beredi.
Stantsııanyń búkil aýmaǵynda derekterdiń turaqty berilýin qamtamasyz etý úshin 10 Wi-Fi kirý núktesinen turatyn jeli iske qosyldy. Bul tsıfrlyq ınfraqurylymnyń úzdiksiz jumys isteýine jaǵdaı jasaıdy.
Jobanyń mańyzdy erekshelikteriniń biri — ony paıdalaný barysynda úzdiksiz jetildirý múmkindigi. Operatorlar algorıtmderdiń jumys nátıjelerin taldap, durys anyqtalǵan oqıǵalardy rastap, jalǵan habarlamalardy alyp tastaıdy. Bul algorıtmderdiń dáldigin turaqty túrde arttyryp, jalpy júıeniń tıimdiligin kúsheıtýge, sonyń nátıjesinde kásiporyndaǵy qaýipsizdik pen baqylaý deńgeıin odan ári joǵarylatýǵa múmkindik beredi.
Aıta ketelik Ekibastuz GRES úshinshi energoblogy 2028 jyly iske qosylady.
